Azərbaycan, Bakı, 28 noyabr / Trend , müxbir A.Bədəlova/ Bu həftə Azərbaycan prezidenti İlham Əliyevin İtaliyaya etdiyi səfər Azərbaycan yanacağının Avropaya ixracı, eyni zamanda Turkiyə-Yunanıstan-İtaliya (ITGI) qaz boru kəməri layihəsinin realizəsi yolunda müsbət addımdır, - Trend -ın rəylərini öyrəndiyi beynəlxalq ekspertlər belə hesab edirlər.
Azərbaycan prezidenti Romada İtaliyanın Baş naziri Silvio Berluskoni və ölkənin "Edison" şirkətinin icraçı direktoru Umberto Kuadrino ilə görüşüb.
"Müzakirəyə çıxarılan infrastrukturların əhəmiyyətinin vurğulanması və hər iki tərəf üçün maraqlarını ifadə etmək imkanının yaradılması baxımından bu cür görüşlərin keçirilməsi zəruridir", - İtaliyanın Bruno Leoni İnstitutunun enerji üzrə departament direktoru Karlo Staqnaro (Carlo Stagnaro) Trend -a elektron poçtla bildirib. İtaliyalı ekspertin fikrincə, "Edison" şirkəti Azərbaycan qazının alınmasında çox maraqlıdır.
Fransanın Beynəlxalq Əlaqələr İnstitutunun (IFRI) Brüssel ofisinin rəhbəri, enerji üzrə aparıcı ekspert Süzan Nays (Susanne Nies) da İlham Əliyevin İtaliyaya səfərinin müsbət addım olması rəyi ilə razıdır.
"Azərbaycanla İtaliya arasında 2007-ci ilin dekabrında imzalanan qaz protokolu ITGI layihəsi üçün mühüm addım olub", - Nays deyib. Onun sözlərinə görə, Xəzər qazının Avropaya sabit ixracı məsələsində bəzi problemlər qalmaqdadır və bu problemlər arasında Türkiyə infrastrukturunun yenilənməsi məsələsi də var.
İtaliya ITGI qaz kəməri vasitəsilə ildə Azərbaycandan səkkiz mlrd. kubmetr qaz almaq niyyətindədir.
İtaliya ilə Azərbaycan arasında 2007-ci ilin dekabrında imzalanan protokola əsasən, tərəflər "Edison" və SOCAR (Azərbaycan Dövlət Neft Şirkəti) arasındakı ITGI nəqliyyat dəhlizinin ötürmə gücünə və Azərbaycanda qaz hasilatı layihələrinə uyğun olaraq qaz nəqli, nəqlin miqdarı və sürəkliliyi ilə bağlı danışıqlara zəruri dəstəyi verəcək koordinasiya komitəsinin yaradılması ilə bağlı razılığa gəliblər.
Beynəlxalq ekspertlər hesab edirlər ki, dünya maliyyə böhranına baxmayaraq, ITGI layihəsi əvvəl olduğu kimi, yenə də realizə olunandır.
"Təbii qaza tələbat əvvəl olduğu kimi artıma məhkumdur. Əminəm ki, ITGI layihəsi sərmayə cəhətdən cəlbedici olacaq", - Staqnaro deyib.
2012-ci ildə İtaliyanı, Yunanıstanı və Turkiyəni birləşdirəcək ITGI qaz kəmərinin planlaşdırılan ötürmə gücü ildə 12 mlrd. kubmetrdir. Azərbaycan qazını Yunanıstana və İtaliyaya nəql edəcək ITGI nəqliyyat dəhlizi yenilənmiş boru kəməri infrastrukturunu (Türkiyə), eyni zamanda ITG (Turkiyə-Yunanıstan birləşdirici boru kəməri) və IGI-ni özündə birləşdirir. Yunanıstan-İtaliya birləşdirici boru kəməri Turkiyə-Yunanıstan-İtaliya nəqliyyat dəhlizinin çatışmayan bəndini ehtiva edir ki, bu da Turkiyə və Yunanıstandan keçməklə qazın Yaxın Şərq və Xəzər bölgəsindən İtaliyaya və Qərbi Avropaya nəqlinə imikan verəcək.
Materialın hazırlanmasında Yelena Ostapenko da iştirak edib.
Müəlliflərlə əlaqə ünvanı: [email protected]