İran neftin büdcə qiymətini 40 dollar səviyyəsində təsdiq edib – iranlı deputat
İran, Tehran, 24 dekabr/ Trend , müxbir A.Namdari/ İran hökuməti gələn ilin büdcəsində neftin 1 barelinin qiymətini 40 dollar səviyyəsində müəyyən edib və büdcə layihəsini təsdiq edilmək üçün parlamentə göndərib, - İran parlamenti iqtisadiyyat komissiyasının üzvü Abbasəli Nura Trend -a bildirib.
"Parlament və hökumət gələn ilin büdcəsi ilə bağlı vahid rəydədir", - Nura deyib.
Onun sözlərinə görə, Əhmədinejad hökuməti iki həftə ərzində gələn ilin büdcə layihəsini parlamentə təqdim etməlidir. Cari ilin dövlət büdcəsinin kəsiri 7 mlrd. tümən təşkil edib.
İranda 2005 - ci ildə prezident seçkilərindən sonra Mahmud Əhmədinejad hökuməti ehtiyat valyuta Fondundan vəsaitlərin çıxarılması üçün dəfələrlə parlamentə müraciət edib. Hökumətin ehtiyat valyuta Fondundan vəsait çıxarması ölkədə inflyasiyaya səbəb olub.
İranda ehtiyat valyuta Fondu Məhəmməd Hatəminin prezidentliyi dövründə yaradılıb. Fond neft gəlirlərinin toplanması məqsədilə yaradılıb.
Son aylarda Əhmədinejad hökuməti iqtsadi siyasət ekspertlərinin, həmçinin, dini alimlərin tənqidinə məruz qalıb.
Onlara cavab verən İran prezidenti ölkədəki inflyasiyanın dünya maliyyə böhranı ilə bağlı olduğunu bildirərək, öz bədxahlarını "yalan danışmaqda" ittiham edib.
Ekspertlər "Yüksək səmərəlilikli iş mərkəzləri" planına əlavə vəsaitlərin ayrılmasını dəfələrlə tənqid ediblər. İran Mərkəzi Bankının sədri Təhmasib Məzahiri bu plana əlavə vəsaitlər ayırmaqdan imtina etdiyi üçün vəzifəsindən kənarlaşdırılıb.
İndiyədək Əhmədinejad iki dəfə iqtisadiyyat, üç dəfə Mərkəzi Bank sədrini dəyişib.
O, öz seçkiqabağı kampaniyasında neft gəlirlərinin əhali arasında ədalətli bölgüsünü vəd edirdi.
Hazırda Əhmədinejad hökuməti iqtisadi islahatlar layihəsini parlamentdə təsdiqlətdirməyə hazırlaşır. Hökumətin rəsmi nümayəndələrinin sözlərinə görə, ölkədə aparılan sorğunun nəticələri 63 mln. nəfərin layihənin realizəsini dəstəklədiyini göstərib. Layihəyə əsasən, bəzi məhsullar üçün subsidiyalar əhaliyə nəqd pul şəklində ödəniləcək.
Müəlliflə əlaqə saxlamaq üçün elektron ünvan: [email protected]
