Azərbaycan, Bakı, 04 mart / Trend / SOCAR şirkəti (Azərbaycan Respublikası Dövlət Neft Şirkəti) 2009-cu il ərzində "Günəşli" yatağının dayaz hissəsində 10-12 yeni quyu qazmaq niyyətindədir, - şənbə günü Azərbaycan neft sənayesi mənbələrindən məlumat verilib. Bu quyular arasında həm neft, həm də qaz quyuları olacaq.
"Günəşli" SOCAR tərəfindən müstəqil şəkildə işlədilən ən iri neft-qaz yatağıdır. SOCAR tərəfindən hasil edilən ümumi neftin 60 faizi və qaz həcminin 70 faizi bu yatağın payına düşür.
Yeni quyuların qazılması "Günəşli" neft-qaz yatağının dayaz hissəsində işləyən NQHİ-nin "28 may" yeni inkişaf proqramı çərçivəsində həyata keçirilir. 2008-2020-cu illər üçün nəzərdə tutulan proqram çərçivəsində neft hasilatının stabilləşdirilməsi və təbii qaz hasilatının artırılması nəzərdə tutulub.
Məqalə müəllifi ilə əlaqə ünvanı: [email protected]
