Azərbaycan, Bakı, 12 mart / Trend /
"2008-ci ildə Azərbaycan abunəçilərinin qaz sayğacları ilə təminat səviyyəsi 99,2 faiz təşkil edib. 2003-cü ildə bu rəqəm 6,1 faiz olub", - Nazirlər Kabinetinin 2008-ci ildəki fəaliyyətə dair hesabatında deyilir.
2008-ci ildə qaz sayğacları ilə təmin edilmiş abunəçilərin sayı 1 223 453 nəfərə çatıb ki, beş il əvvəl bu rəqəm 53 150 nəfər olub.
2008-ci ildə əhalidən qaz sayğacları ilə təmin edilmiş abunəçilərin sayı 1 156 447 (əvvəlcədən ödəmə kartlarının istifadə olunduğu 37 908 ədəd elektron sayğaclar da daxil olmaqla) çatıb ki, 2003-cü ildə bu rəqəm 41 550 abunəçi olub.
Əhalinin qaz sayğacları ilə təminatının səviyyəsi də həmçinin 99,2 faiz təşkil edib. 2003-cü ildə əhalinin 4,8 faizi sayğacla təmin edilmişdi.
2008-ci ildə ölkədə ümumi qaz abunəçilərinin sayı 1 233 178 olub. 2003-cü ildə bu rəqəm 875 362 olub.
Ümumilikdə 2008-ci ildə ölkənin qaz anbarlarına bir milyard kubmetrdən çox qaz vurulub ki, bu da 2003-cü ilin göstəricisindən təxminən iki dəfə çoxdur. Ötən il vurulmuş və 2007-ci ildən orada qalmış qazla birlikdə yeraltı qaz anbarlarındakı qaz ehtiyatı 1,4 milyard kubmetrə çatıb.
Hazırda Azərbaycan iki yeraltı - Qaradağ və Kalmaz qaz anbarlarından istifadə edir.
Hazırda Qaradağ qaz anbarının gücü 500 milyon kubmetr təşkil edir. 2010-cu ilin martına SOCAR şirkəti Qaradağ yeraltı qaz anbarının 1,4 milyard kubmetrə qədər genişləndirilməsinin birinci mərhələsini başa çatdıracaq. Kalmaz qaz anbarının gücü 1,1 milyard kubmetrdir.
