Azərbaycan, Bakı, 10 aprel / Trend /
"SOCAR özünə aid olan "Bibiheybətneft" və "Qum adası" neft-qaz hasilatı idarələrində nəzarət-ölçü ekoloji məntəqələri yaradıb", - SOCAR-ın ekologiya idarəsinin yaydığı məlumatda deyilir.
Məntəqələr 2006-2010-cu ildə Azərbaycanın ekoloji vəziyyətinin yaxşılaşdırılması kompleks tədbirləri çərçivəsində həyata keçirilir. Məntəqələrin yaradılmasında başlıca məqsəd, SOCAR avtomobilləri vasitəsi ilə (təqribən 5 min ədəd) atmosferə atılan tullantıların monitorinqini aparmaqdan, avtomobilləri qanunvericilik və standartların tələb etdiyi normalara uyğun vəziyyətə gətirməkdən ötrü məsləhətlər vermək və ictimaiyyəti görülən işlərlə tədbirlər barədə məlumatlandırmaqdan ibarət olacaq.
Yeni məntəqələr ölçüləri stasionar və səyyar yollarla aparacaqlar. Qiymətləndirmə temperatur göstəriciləri, dəm qazının, karbohidrogen, azot oksidlərinin həcmi və digər göstəricilərə əsasən aparılacaq.
Avtomobil vasitələrinin və digər texniki avadanlıqların ildə bir dəfə sözügedən məntəqələrdə yoxlamadan keçirilməsi planlaşdırılır.
Gələcəkdə bu məntəqələrdə Ekologiya və Təbii Sərvətlər Nazirliyi və Dövlət Yol Polisinə məxsus avtomobil vasitələrinin baxışdan keçirilməsi də planlaşdırılır.