Azərbaycan, Bakı, 19 may / Trend , müxbir E.İsmayılov /
SOCAR şirkəti (Azərbaycan Dövlət Neft Şirkəti) tərəfindən Palmali şirkəti ilə birgə Türkiyənin Tekfen Insaat tikinti şirkətində 50 faizlik iştirak payının əldə edilməsi məsələsi ilin sonlarında yenidən nəzərdən keçiriləcək. Bu barədə SOCAR-ın Türkiyə nümayəndəliyindən bildiriblər.
"Bu məsələnin ilin sonlarında yenidən nəzərdən keçirilməsi gözlənir", - deyə mənbə bildirib.
"Bu cür böhran şəraitində hansısa alqı-satqı əməliyyatı aparmaq və tikinti şirkətinin səhmlərini əldə etmək bir qədər risklidir. Və bu səbəbədən bu proqramı bir müddət təxirə salmışıq", - SOCAR şirkətinin rəhbəri Rövnəq Abdullayev bir müddət əvvəl belə deyib.
Əvvəllər tərəflər arasında saziş imzalanıb, lakin satın alma barədə müqavilə hələ imzalanmayıb. Sövdələşmənin dəyəri 520 mln. dollar qiymətləndirilir.
Bu alyansın beş il ərzində Tekfen şirkətini 37 mlrd. dollarlıq iş ilə təmin edilməsinə imkan yaradacağı güman olunurdu. İşlər bütün dünya üzrə neft sektoru sahəsində inşaatı özündə birləşdirir. Tekfen qrupu neft emalı və neft-kimya obyektlərinin yaradılması və tikintisi işlərini həyata keçirəcək.
Palmali ərzaq və tikinti sektorları, həmçinin səhiyyə, turizm, avia daşıma sahələrinə sərmayə yatırır. Palmali şirkəti əhəmiyyətli tanker donanmasına malikdir və yaxın illərdə onun genişləndirilməsinə 1,3 mlrd. dollar yatırmaq niyyətindədir.
Məqalə müəllifi ilə əlaqə ünvanı: [email protected]
