Azərbaycan, Bakı, 22 may / Trend , müxbir E.İsmayılov /
Azərbaycan "Şah Dəniz" yatağından hasil edilən qazı Türkiyəyə ədalətli, bazar qiymətlərinə uyğun şəkildə satmaq niyyətindədir. Bu barədə cümə günü Azərbaycanın sənaye və energetika naziri Natiq Əliyev deyib.
"Hazırda qiymətlərin artırılması məsələsi müzakirə edilir. Hər malın öz qiyməti olduğu kimi, Azərbaycan qazının da öz qiyməti var və biz bazar qiymətləri səviyyəsinə çatmağı qarşımıza hədəf qoymuşuq", - Əliyev qeyd edib.
Nazirin sözlərinə əsasən, Türkiyə qazı müxtəlif mənbələrdən əldə edir və Bakı istəyir ki, Ankara digər ölkələrdən hansı şərtlərlə qaz əldə edirsə, Azərbaycandan da eyni qaydada alsın.
Azərbaycan "Şah Dəniz" yatağının işlənməsinin birinci mərhələsi çərçivəsində Türkiyəyə təchiz edilən qazın qiymətini artırmaq niyyətindədir. Hazırda Azərbaycan qazı Türkiyəyə 1000 kub metri 120 dollara satılır. Lakin bu qiymət 2001-ci ildə əldə olunmuş razılaşmada əks olunub.
Türkiyə ilə imzalanmış razılaşmaya əsasən, "Şah Dəniz" qazının qiymətinə tədarükdən bir il sonra baxıla bilər. Deməli, yeni qiymətlər 2008-ci il aprelin 15-dən tətbiq ediləcək.
Müqaviləyə əsasən, Türkiyə "Şah Dəniz" layihəsinin işlənməsi üzrə birinci mərhələ çərçivəsində bu yataqdan 6,6 mlrd. kubmetr qaz əldə etməlidir. Layihə üzrə tərəfdaşlar artıq cari ildə bu tədarük həcminə nail olacaqlar.
"Şah Dəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Məqalə müəllifi ilə əlaqə ünvanı:[email protected]