Azərbaycan, Bakı, 02 iyun / Trend , müxbir İ.Xəlilova /
"Bu il "Azəriqaz" QSC 11 milyard kubmetr qaz əldə edəcək", - çərşənbə axşamı QSC-nin başçısı Əlixan Məlikov deyib.
"Əldə olunan qazın 50-60 faizi emal üçün yanacaq qismində "Azərenerji"yə veriləcək. Qalan hissəsi isə istehlakçıların daxili tələbatının ödənilməsi üçün istifadə olunacaq", - Məlikov bildirib.
Onun sözlərinə görə, qazın bir hissəsinin payız-qış mövsümündə istifadə olunmaq üçün yeraltı qaz anbarlarına vurulması planlaşdırılır.
Bu il qaz anbarlarına ümumilikdə 1,4-1,5 milyard kubmetr qaz vurulması planlaşdırılır. Artıq təxminən 225 milyon kubmetr qaz anbarlara vurulub.
"Ancaq anbarlarda hələ ötən ildən qalan 640 milyon kubmetr qaz var və anbarlardakı ümumi qaz həcmi hazırda 800 milyon kubmetri ötür", - Məlikov qeyd edib.
