Azərbaycan, Bakı, 04 iyun / Trend , müxbir A. Bədəlova /
ITGI boru kəməri layihəsi (Türkiyə-Yunanıstan-İtaliya) investisiya məsələsi ilə bağlı qərar qəbulu mərhələsindədir və "Şah Dəniz" yatağının işlənilməsinin ikinci mərhələsində qaz satışı üzrə Azərbaycanın razılığını gözləyir. Bu barədə cümə axşamı Trend -a Bakıda olan ITGI layihəsinin rəhbəri, İtaliyanın Edison S.P.A şirkətinin biznes inkişafı üzrə direktoru Ellio Ruceri bildirib.
"ITGI layihəsi üzrə son investisiya qərarı Azərbaycan "Şah Dəniz " yatağının işlənilməsinin ikinci mərhələsi çərçivəsində qaz satışına hazır olduğunu bildirdikdən sonra qəbul edilə bilər", - deyə Ruceri bildirib.
Rucerinin sözlərinə əsasən, bu layihə Azərbaycana öz qazının Türkiyəyə minimal əlavə investisiya xərci ilə ixracının daha sürətli variantını təklif edir.
"ITGI Azərbaycana "Şah Dəniz" yatağının işlənilməsinin ikinci mərhələsində qaz satışı üzrə çox sərfəli saziş təklif edir", - deyə Ruceri bildirib.
Rucerinin də qeyd etdiyi kimi, Azərbaycan qazı alınmadığı halda, şirkət ona alternativlər axtaracaq.
"Əlbəttə, biz hesab edirik ki, Azərbaycan qaz tədarükü üzrə daha səmərəli mənbədir. Lakin Azərbaycandan qaz tədarük olunmadığı təqdirdə, biz bu mənbənin alternativlərini axtaracağıq. Qısamüddətli prespektivdə bu, Rusiya qazıdır", - deyə Ruceri bildirib.
