Azərbaycan, Bakı, 10 avqust / Trend , müxbirlər E.İsmayılov, R.Hafizoğlu /
Azərbaycan və Türkiyə arasında inşa edilməsi planlaşdırılan qaz kəmərinin gücü ildə 500 milyon kubmetr təşkil edəcək. Bazar ertəsi Türkiyənin Energetika və Təbii Ehtiyatlar Nazirliyinin rəsmi nümayəndəsi Mehmet Akif bildirib.
"Yeni qaz kəmərinin illik buraxılış gücü 500 milyon kubmetr, onun sutkalıq gücü isə 1,5 milyon kubmetr təşkil edəcək", - Akif bildirib.
Akifin bildirdiyi kimi, qaz kəmərinin tikintisi çərçivəsində tərəflərin hər biri öz hissəsindəki inşa işlərini özləri həyata keçirəcək. "Türkiyə sərhədə kimi inşa işlərini həyata keçirəcək, eyni zamanda Azərbaycan da Naxçıvandan sərhədə kimi tikinti işlərini həyata keçirəcək", - o qeyd edib.
"Qiymət barədə danışmaq hələ ki, mümkün deyil, lakin qərar verilən kimi qaz kəməri inşa ediləcək", - Akif bildirib.
Nazirlik rəsmisinin bildirdiyi kimi, Azərbaycan və Türkiyə arasında tranzit müqavilə üzrə danışıqlar da davam edir. Bu məsələ Türkiyənin energetika və təbii resurslar naziri Taner Yıldızın Naxçıvana səfəri zamanı danışıqların mövzusu olub. "Daha bir görüşün keçirilməsinə ümid edirik", - Akif əlavə edib.
Dünən Azərbaycan və Türkiyə İğdır (Türkiyə) - Naxçıvan (Azərbaycanın tərkibində muxtar respublika) qaz kəmərinin inşası üzrə razılığa gəliblər. Naxçıvan Dağlıq Qarabağ münaqişəsi səbəbindən hazırda blokadada yerləşir.
Azərbaycan "Şahdəniz" dəniz qaz-kondensat yatağının işlənməsi çərçivəsində "Bakı-Tbilisi-Ceyhan" kəməri ilə Türkiyəyə qaz nəql edir. Belə ki, Naxçıvan üçün nəzərdə tutulan qaz Azərbaycandan mövcud kəmərlə nəql olunacaq, sonra isə İğdır-Naxçıvan qaz kəməri ilə Naxçıvana veriləcək. Hazırda Naxçıvan Azərbaycan ilə "svop" əməliyyatları çərçivəsində İrandan qaz alır. Azərbaycan İrana qaz tədarük edir, o da öz növbəsində qazı Naxçıvan MR-ə ötürür.
Müqaviləyə əsasən, Türkiyə "Şahdəniz" yatağından bu layihənin işlənməsinin birinci mərhələsi çərçivəsində 6,6 milyard kubmetr qaz əldə etməlidir. Tədarüklərin bu həcmini tərəfdaşlar bu ildən əldə edəcəklər.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
Məqalə müəllifi ilə əlaqə ünvanı: [email protected]
