Azərbaycan, Bakı, 20 avqust / Trend /
Türkiyənin "Petkim" neft-kimya kompleksi BP-dən qazın doldurulması və saxlanması üzrə park alıb. Bu barədə Türkiyənin CNN Turk telekanalı xəbər verir. Sazişin dəyəri beş milyon lirə (3,35 milyon dollar) təşkil edir.
Park Türkiyənin İzmir və Əliağa şəhərləri arasındakı Paşaçiftliyi rayonunda yerləşir və təxminən 26 min kvadratmetr ərazini əhatə edir. Burada bütün lazımi avadanlıqlar yerləşdirilib, həmçinin 4,8 min kubmetr qazın saxlanılması da mümkündür.
Bir müddət əvvəl ARDNŞ ilə Turcas Petrol/Injaz Projects-in alyansı "Petkim" kimya konserninin 51 faizlik səhmlərinin alınması üzrə elan olunan tenderdə 2,04 milyard dollar təklif edərək qalib olmuşdu. Hazırda Türkiyə lazım olan kimya məhsullarının 70-75 faizini idxal edir, SOCAR/Turcas/Injaz-ın "Petkim"in inkişafına yönəltdiyi sərmayələr isə məhsul idxalını 30 faizə qədər azaltmaq imkanı verəcək.
Petkim Petrokimya Holding plastik örtüklər, parçalar, yuyucu vasitələr istehsal edir və Türkiyədə belə məhsulların yeganə istehsalçısı olaraq qalır. Şirkət məhsulun 1/4-ni ixrac edir.
