Azərbaycan, Bakı, 14 sentyabr / Trend , müxbir E.İsmayılov /
Avropa Yenidənqurma və İnkişaf Bankı (AYİB) AZMECO şirkəti üçün Azərbaycanda metanol istehsalı üzrə zavodun inşası çərçivəsində 120 milyon dollar məbləğində kreditin bəyənilməsi tarixini 21 oktyabra təyin edib. Bu barədə bazar ertəsi AZMECO-dan deyilib.
"Kreditin ilkin təsdiqinin sentyabrın 22-nə təyin edilməsinə baxmayaraq, dəqiqləşdirilmiş məlumata görə, bu məsələ bankın Direktorlar Şurası tərəfindən oktyabrda müzakirə olunacaq", - mənbə dən deyilib.
Maliyyələşmə iki tranş üzrə həyata keçiriləcək: 90 milyon dollar bankın vəsaitindən 9 il müddətinə ayrılacaq, qalan 30 milyon dollar isə 10 ilə veriləcək.
Mənbənin dediyi kimi, zavodun inşasına lazım olan əlavə vəsaitlərin cəlb edilməsi üçün Almaniya, Avstriya və Hollandiya bankları ilə də danışıqlar davam etdirilir. Bu banklar bir müddət əvvəl zavodun inşasını maliyyələşdirməyə hazır olduqlarını bildirmişdilər.
"Hazırkı mərhələdə hər hansı bir məsələ barədə danışmaq hələ tezdir, hər şey danışıqlar mərhələsindədir", - mənbədən bildirilib.
Zavodun inşası üzrə işlər hələ 2007-ci ildə başlayıb. Bu layihədə AZMECO-nun xüsusi əmanəti 70 milyon dollardır. Bu layihənin maliyyələşdirilməsi prosesində Azərbaycan Beynəlxalq Bankı, EDC of Canada və Qara Dəniz Ticarət və İnkişaf Bankı da iştirak edir.
Zavodun inşası layihəsinin ümumi dəyəri 300 milyon dollardan çoxdur.
Qaradağ rayonunda yerləşəcək yeni metanol zavodunun gələn ilin üçüncü rübündə istifadəyə verilməsi planlaşdırılır.
Birinci faza çərçivəsində metanol zavodunun istehsal gücü ildə 720 min ton təşkil edəcək. Azot gübrəsi istehsalının yaradılmasını nəzərdə tutan kompleksin inşası üzrə ikinci faza çərçivəsində işlərin başa çatması 2011-ci ilə nəzərdə tutulur. Layihənin ikinci faza çərçivəsində təxminən 400 min ton azot gübrəsi istehsal etmək planlaşdırılır.
Məqalə müəllifi ilə əlaqə ünvanı: [email protected]