Qazaxıstan, Astana, 24 sentyabr / Trend , müxbirlər K.Konırova, E.İsmayılov /
Avropa İttifaqı özündə zəngin qaz istehlakı bazarını əks etdirir və buna görə də "Nabukko" qaz kəməri layihəsinin həyata keçirilməməsi üçün heç bir səbəb yoxdur. Bu barədə cümə axşamı Astanada Avropa Komissiyasının Energetika üzrə Komissarlığı kabinetinin üzvü Roland Kobia bildirib.
"Aİ milyonlarla insan deməkdir və bizim adambaşına yüksək gəlirimiz var. Biz özümüzdə zəngin istehlak bazarı əks etdiririk və buna görə də biz "Nabukko" layihəsinin həyata keçirilməməsi üçün heç bir səbəb görmürük", - Kobia bildirib.
Onun fikrincə, "Nabukko" mürəkkəb layihədir, lakin həm siyasi, həm də iqtisadi baxımdan dəstəklənməlidir. "Heç bir təsirdən asılı olmayaraq bu layihə hazırlanır, çünki AYİB və Dünya Bankı da daxil olmaqla, bütün maliyyə institutları, həmçinin bir çox tərəflər layihənin baş tutmasında maraqlıdırlar", - o deyib.
"Düşünürəm ki, layihənin həyata keçirilməsi ona dair qərarın qəbul edilməsi ilə müqayisədə daha asan baş verəcək, çünki bizim əsas üstünlüyümüz var, bu qabaqcadan bildirmə və hesabatlılıqdır. Bu layihənin həyata keçirilib-keçirilməyəcəyinə gəldikdə isə mən başqa bir misal gətirəcəyəm: 15 il bundan öncə heç kim "Bakı-Tbilisi-Ceyhan"ın həyata keçiriləcəyinə inanmırdı, lakin hazırda bu layihə mövcuddur və biz onun vasitəsilə dünya bazarlarına neft nəql edirik. İndi həmin vəziyyət "Nabukko" ilə yaranıb", - Kobia bildirib.
Dəyəri 7,9 mlrd. avro olan "Nabukko" kəməri ilə Xəzər regionu və Yaxın Şərqdən Aİ ölkələrinə qazın ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Qaz kəmərinin inşası üzrə konsorsiumda Avstriyanın OMV Gas Gmbh, Macarıstanın MOL, Bolqarıstanın Bulgargaz, Rumıniyanın S.N.T.G.N. Transgaz, Türkiyənin Botaş və Almaniyanın RWE şirkətləri iştirak edir.
Məqalə müəllifi ilə əlaqə ünvanı: [email protected]