Qazaxıstan, Astana, 25 sentyabr / Trend , müxbirlər K.Konırova, E.İsmayılov /
Azərbaycanda ARDNŞ-nin (Azərbaycan Respublikası Dövlət Neft Şirkəti) brendi altında 26 yanacaqdoldurma məntəqəsinin (YDM) inşası gələn ilin mayında başa çatacaq. Bu barədə cümə günü Astanada ARDNŞ prezidenti Rövnəq Abdullayev deyib.
ARDNŞ-nin digər yüksək vəzifəli nümayəndəsinin sözlərinə görə, ilin sonunadək ölkədə şirkətin brendi altında doqquz YDM açılacaq.
"Hazırda eyni vaxtda 26 yanacaqdoldurma məntəqəsinin inşası aparılır. Və indi biz Azərbaycanda ARDNŞ brendinin yaradılması üzərində çalışırıq", - bir müddət əvvəl Abdullayev deyib.
ARDNŞ-nin yüksək vəzifəli nümayəndəsinin bir müddət əvvəl dediyinə görə, bu layihənin realizəsi üçün SOCAR Petroleum (ARDNŞ və A.P. Petroleum) birgə müəssisəsi yaradılıb. Şirkətin nizamnamə kapitalı 10 milyon dollardır. Bu kapital ARDNŞ tərəfindən yatırılıb. BM Azərbaycanda distribüterlik fəaliyyəti ilə məşğul olacaq.
Mənbənin dediyinə görə, hazırkı inkişaf planına əsasən, başlanğıc mərhələdə 26 YDM-in açılması planlaşdırılır, lakin gələcəkdə ümumi inkişafı nəzərə alaraq onların sayı artırılacaq.
Birgə müəssisə artıq fəaliyyət göstərir və həm kredit resursları, həm də öz dövriyyəsi hesabına tədricən YDM inşasını həyata keçirəcək.
Hazırda ARDNŞ Gürcüstanda YDM şəbəkəsinə (20 ədəddən çox) malikdir. Onların sayının yaxın illərdə 60 -a çatdırılması nəzərdə tutulur.
Məqalə müəllifi ilə əlaqə ünvanı: [email protected]