Azərbaycan, Bakı, 26 sentyabr / Trend , müxbir V.Javoronkova/
Rusiya və Türkmənistan arasında qazın qiyməti üzrə fikir ayrılığı Aşqabadın "Nabukko" qaz kəməri layihəsinə nəzər yetirməsinə gətirib çıxarıb.
"Rusiya bir neçə həftədir ki, türkmən qazının alınmasına razılıq verməyib, bu da Türkmənistan rəhbərliyini "Nabukko"nu dəstəkləmək, Çin və ya Qərblə işləmək haqqında ciddi qərar qəbul etməyə vadar edib", - MDB dövlətlərinin enerji məsələləri üzrə avropalı ekspert Aleksandr Rar belə hesab edir.
Demək olar ki, Türkmənistan qazının hamısını Rusiya idxal edirdi, lakin yazdan başlayaraq tədarük "Orta Asiya-Mərkəz" qazkəmərində baş verən qəza səbəbindən dayandırılb. Bu kəmərin təmiri sentyabrın ortalarında başa çatıb. İndiki mərhələdə qaz sənayesi dəyər və həcmlə əlaqədar yeni şərtləri irəli sürür.
"Türkmənistan layihənin əhəmiyyətini anladığına görə, "Nabukko"-ya döğru ilk addımını atır. Əvvəllər Türkmənistanda layihəyə laqeyd yanaşırdılar", - Almaniyanın xarici siyasət şurasının "Rusiya-Avrasiya" mərkəzinin direktoru Rar Berlindən telefonla Trend -a deyib.
BP-nin məlumatına görə, Türkmənistanın qaz ehtiyatı 2009-cu il yanvarın 1-də 7,94 trilyon kubmetr qaz təşkil edib. Beləliklə, bu ölkə Rusiya, İran və Qətərdan sonra dördüncü yeri tutur. Türkmənistan dünyada ən iri yataqlardan biri olan "Cənubi Yolotan" yatağına sahibdir. Britaniyanın "Gaffney Cline" tədqiqat firmasının məlumatına görə, keçən il bu qaz yatağında ehtiyat 4-14 trilyon kubmetr təşkil edib.
Dəyəri 7,9 mlrd. avro olan "Nabukko" kəməri ilə Xəzər regionu və Yaxın Şərqdən Aİ ölkələrinə qazın ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botaş və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi layihədə iştirak payı əsasında Nabucco Gas Pipeline International-ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.
Məqalə müəllifi ilə əlaqə ünvanı: [email protected]
