Azərbaycan, Bakı, 06 oktyabr / Trend , müxbir E.İsmayılov/
Xəzər dənizinin Azərbaycan sektorunda yerləşən "Azəri-Çıraq-Günəşli" (AÇG) neft-qaz yataqlar blokunda hazırda sutkalıq hasilat 880 min barelə (120 min ton) yaxındır. Bu barədə çərşənbə axşamı neft-qaz bazarındakı mənbədən məlumat verilib.
"Hazırda yataqlar blokundan sutkalıq 120 min ton neft hasil edilir", - mənbədən belə deyilib.
Mənbə yataqdan onun işlənməsi zamanı ayrılan səmt qazının həcmini açıqlamayıb. "AÇG-dən hasil edilən qazın həcmi barədə söz demək çətindir. Çünki qazın bir hissəsi ARDNŞ-yə verilir, bir hissəsi isə laylarda sıxılır", - mənbədən bildirilib.
Beləliklə, AÇG yatağının işlənməsi layihəsinin operatoru olan BP şirkəti bu ilin birinci yarısında bu yataqlar blokundan 146 milyon barelə yaxın (20 milyon tona yaxın) neft hasil edib. Bu barədə BP şirkətinin bu ilin birinci yarısına olan rəsmi hesabatında deyilir.
BP-nin ilin birinci yarısında istismar xərcləri 348 milyon dollar, kapital xərcləri isə 488 milyon dollar təşkil edib. Proqnozlara müvafiq olaraq, 2009-cu ildə AÇG layihəsi üzrə şirkətin istismar xərcləri 839 milyon dollar, kapital xərcləri isə 1,6 milyard ABŞ dollarından artıq təşkil edəcək.
Bu ilin əvvəlindən BP ARDNŞ-yə AÇG yatağından gündəlik 11,5 milyon kubmetrə yaxın səmt qazı tədarük edib. 2009-cu ildə şirkət ARDNŞ-yə 1,45 milyard kubmetrdən artıq səmt qazı tədarük etməyi planlaşdırır. Lakin BP artıq bu həcmi artıraraq 2009-cu ilin birinci yarısında 2,1 milyard kubmetrə yaxın edib.
"Azəri-Çıraq-Günəşli" yataqlar blokunun səhmdarları bunlardır: ВР (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TRAO (6,8%), Devon (5,6%), ITOCHU (3,9%), Hess (2,7%).
Məqalə müəllifi ilə əlaqə ünvanı: [email protected]
