Azərbaycan, Bakı, 09 oktyabr / Trend , müxbir Ü.İsmayılov/
Standartlaşdırma, Metrologiya və Patent üzrə Dövlət Komitəsi qida sənayesində qayda pozuntuları ilə tez-tez rastlaşır. Bu barədə komitənin sədri Ramiz Həsənov hakim Yeni Azərbaycan Partiyasının saytında yerləşdirilən müsahibəsində bildirib.
"Qayda pozuntuları əsasən sınaq laboratoriyalarının akkreditasiya müddətinin bitməsi, ölçmə və sınaq vasitələrinin dövlət yoxlanışından keçirilməməsi, istehsal olunan məhsulların dövlət standartlarının tələblərinə cavab verməməsi, hazır məhsulların və istifadə olunan xammal və köməkçi materialların müvafiq uyğunluq və gigiyenik sertifikatlarının olmaması kimi səbəblərdən yaranır", - Həsənov deyib.
Onun sözlərinə görə, komitə əməkdaşlarının araşdırmaları nəticəsində uyğunluq sertifikatları olmayan qazla işləyən məişət cihazlarının satışına da rast gəlinib. Kustar üsulla hazırlanan satışda olan qaz cihazları da bazarda kifayət qədərdir. Bəzən bu cihazların hazırlandığı kiçik sexləri aşkar etmək o qədər də asan olmur. Keçirilən monitorinqlər nəticəsində cari ildə 159 ticarət obyektinin 46-da uyğunluq sertifikatı olmayan 25 adda xeyli sayda qazla işləyən müxtəlif təyinatlı məişət cihazları aşkar olunub.
Məqalə müəllifi ilə əlaqə ünvanı: [email protected]