Azərbaycan, Bakı, 22 yanvar/ Trend , müxbir E.İsmayılov/
2009-cu ildə Türkiyə vasitəsilə "Bakı-Tbilisi-Ceyhan" boru kəməri ilə neft nəqli artıb. 2008-ci ildə bu göstərici 264,1 milyon barel təşkil edib. Bu barədə Türkiyənin "Botaş" dövlət boru kəmər şirkətinin rəsmi internet saytında yerləşdirilən məlumatda deyilir. 2007-ci ildə bu göstərici 210 milyon bareldən artıq olub.
Keçən ilin dekabr ayında Türkiyə vasitəsilə BTC ilə 22,3 milyon barelə yaxın neft nəql edilib.
BTC neft kəməri vasitəsilə əsasən Azəri Light markalı yüngül Azərbaycan nefti, həmçinin az həcmdə Qazaxıstan nefti nəql edilir.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycanın, 249 km-i Gürcüstanın, 1076 km-i isə Türkiyənin ərazisindən keçir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Keçən il Türkiyə vasitəsilə "İraq-Türkiyə" boru kəməri ilə 167,6 milyon barel neft nəql edilib. 2008-ci ildə bu göstərici 135,5 milyon barel olub.
Türkiyə vasitəsilə "Ceyhan-Kırıkkale" boru kəməri ilə 20,2 milyon barelə yaxın neft nəql edilib. 2008-ci ildə bu göstərici 21,4 milyon barel olub.
Keçən il "Batman-Dördyol" boru kəməri ilə 12,2 milyon barel neft nəql edilib. 2008-ci ildə bu göstərici 11,1 milyon barel olub.