Azərbaycan, Bakı, 29 yanvar / Trend , müxbir E.İsmayılov/
Hazırda Xəzər dənizinin Azərbaycan sektorunda yerləşən "Şahdəniz" dəniz qaz-kondensat yatağında sutkalıq qaz hasilatı 22 milyon kubmetr təşkil edir. Bu barədə cümə günü neft-qaz bazarındakı mənbə deyib.
"Yataqda qaz hasilatı normal səviyyədədir və sutkada 22 milyon kubmetr təşkil edir", - mənbə deyib. Hazırda yataqda qaz hasilatı platformada olan 5 quyudan 4-də aparılır.
Neft-qaz bazarından olan digər mənbə bir müddət əvvəl bildirib ki, 5 quyudan 1-də problem olduğu üçün onun bağlanması barədə qərar verilmişdi. Kolonlararası təzyiq səbəbindən quyunun likvidasiyası planlaşdırılsa da, sonradan onun hisə-hissə konservasiyası haqqında qərar qəbul edildi. Hazırda layihənin texniki operatoru olan bp şirkəti bu quyunun konservasiyası işlərini başa çatdırmaq üzrədir. bp şirkəti fevralın ortalarında və ya ilin ikinci yarısında "Şahdəniz" yatağında altıncı hasilat quyusunun qazılmasına başlayacaq. Yeni quyunun qazılması işləri bu ilin sonunadək başa çatmalıdır.
Bu il yataqda 7,84 milyard kubmetr qaz hasilatı nəzərdə tutulur. Yataqda ən yüksək hasilatın 8,6-9 milyard kubmetr həcmində olacağı güman edilir. Proqnozlara əsasən, yatağın işlənməsinin ikinci mərhələsi çərçivəsində burada qaz hasilatının ildə 20 milyard kubmetrədək artırılacağı mümkündür.
"Şahdəniz" yatağından hasil edilən qaz hazırda Gürcüstan və Türkiyəyə nəql edilir. Qazın bir hissəsini isə layihə çərçivəsində Azərbaycan əldə edir.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" dəniz yatağının işlənməsi üzrə müqavilə 4 iyun 1996-cı ildə imzalanıb. Müqavilə iştirakçıları bunlardır: bp (operator) - 25,5 faiz, Statoil hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.