Azərbaycan, Bakı, 11 fevral / Trend , müxbir M.Əliyev/
Qaradağ-Sanqaçal neft terminalının yaradılmasının ilk mərhələsi çərçivəsində tikinti işləri bu ilin ortalarına kimi başa çatacaq. Bu barədə "Azərsun Holdinq"in rəhbəri Əbdülbari Gözəl bildirib.
Layihənin birinci mərhələsinin həyata keçirilməsinə 40 milyon dolların xərclənməsi planlaşdırılır. Ümumilikd,ə layihənin həyata keçirilməsinə 135 milyon dolların xərclənməsi nəzərdə tutulub.
Layihənin əsas operatoru qismində "Qafqaztransservis" ("Azərsun Holdinq" qrupuna daxildir) şirkəti çıxış edir. Qaradağ terminalı böyük həcmdə məhdud məhsulların (kondensat və neft) qəbulu üçün nəzərdə tutulacaq.
Bu terminal vasitəsilə "Kaşaqan" yatağından Qara dəniz sahilindəki terminala və "Bakı-Tbilisi-Ceyhan" neft kəməri vasitəsilə Ceyhan limanına nəql ediləcək xam neftin qəbulu nəzərdə tutulub.
İkinci mərhələnin başa çatması daşımaların həcmindən asılıdır. Birinci mərhələdə terminalın yükboşaltma gücü ildə 12 milyon ton, ikinci mərhələdə isə 20 milyon ton planlaşdırılır.
Terminalın saxlama gücü 200 min kubmetrdir. 600 min kubmetrə kimi genişləndirmə gözlənilir. Layihənin ikinci və üçüncü mərhələsinin həyata keçirilməsi zamanı Qaradağ-Sanqaçal yükboşaltma məntəqəsinin gücü 2011-ci ildən sonra ildə 45 milyon tona çatacaq.
"Azersun Holdinq" 1992-ci ildə yaradılıb. Holdinqin fəaliyyət sferasına çay və bitki yağlarının emalı və çəkilib bükülməsi, ticarət və distribüterlik, inşaat, bank işi, karton-kağız məmulatlarının istehsalı, ət və tərəvəz konservləri, şəkər, yüklərin daşınması, saxlanması və s. daxildir.
