Azərbaycan, Bakı, 17 mart / Trend /
"Bakı-Tbilisi-Ceyhan" (BTC) boru kəməri vasitəsilə 2009-cu ilin yanvar-fevral aylarındakı 5,4 milyon tona nisbətdə bu ilin yanvar-fevral aylarında 5,7 milyon ton neft nəql edilib. Bu barədə Azərbaycan Dövlət Statistika Komitəsindən məlumat verilib.
BTC neft kəməri vasitəsilə 2008-ci ildəki 32,8 milyon tona nisbətdə 2009-cu ildə 38,2 milyon ton neft nəql edilib.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci il mayın 18-də başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
Yanvar-fevralda Cənub Qafqaz qaz kəməri ilə (Bakı-Tbilisi-Ərzurum) 833,7 milyon kubmetr qaz nəql olunub. Ötən ilin analoji dövründə bu göstərici bir milyard kubmetr təşkil edib.
2009-cu ildə "Bakı-Tbilisi-Ərzurum" ilə 5,2 milyard kubmetr qaz nəql olunub. 2008-ci ildə bu göstərici 4,7 milyard kubmetr təşkil edib.
"Bakı-Tbilisi-Ərzurum" boru kəmərinin uzunluğu 700 kilometrdən çoxdur. Ötürülmənin gücü ildə 20 milyard kubmetrdən çox təşkil edir. Bu qaz kəməri ilə Xəzərin Azərbaycan sektorunda yerləşən "Şahdəniz" yatağında hasil edilən qaz nəql olunur. Qaz Gürcüstan və Türkiyəyə tədarük olunur. Qaz alıcısı qismində Azərbaycan da çıxış edir.
