Azərbaycan, Bakı, 29 mart / Trend , müxbir E.İsmayılova/
Hazırda Naxçıvan Muxtar Respublikasının svop əməliyyatları çərçivəsində qazla təmin edilməsi üçün Azərbaycan İrana sutkada 1,4 milyon kubmetr qaz tədarük edir. Bu barədə bazar ertəsi neft-qaz bazarındakı mənbə bildirib.
"Hazırda İrana qaz tədarükü yalnız svop əməliyyatları əsasında həyata keçirilir. Naxçıvan Muxtar Respublikası üçün İrana sutkada 1,4 milyon kubmetr qaz tədarük edilir", - mənbə bildirib.
Azərbaycan və İranı uzunluğu 1474,5 km olan "Qazıməhəmməd-Astara-Bind-Biand" qaz kəməri birləşdirir. Qaz kəmərinin Azərbaycan ərazisindəki hissəsinin uzunluğu 296,5 kilometrdir. Onun buraxılış gücü ildə 10 mlrd. kubmetrdir. Bu marşrut 1971-ci ildə istismara verilən "Qazax-Astara-İran" boru kəmərinin qoludur. Onun üzərində Qazıməhəmməd, Ağdaş və Qazaxda üç kompressor stansiyası tikilib. Qaz nəqliyyatı sistemi 55 atmosfer təzyiqinə hesablanıb. Boru kəmərinin diametri 1200 mm-dir.
ARDNŞ və NIGEC (İran Milli Qaz İxracı Şirkəti) yanvarın birinci yarısında Bakıda Azərbaycan qazının İrana tədarükünə dair qısamüddətli müqavilə imzalayıblar. Ölkələr arasında uzunmüddətli müqavilənin imzalanması bu ilin payızında gözlənilir.
Mənbənin sözlərinə görə, qazın İrana kommersiya tədarükü hələ başlamayıb.
"Azərbaycan qazının İrana kommersiya tədarükünün təmin edilməsi üçün bu ilin payızına ARDNŞ Astarada (Bakıdan 300 kilometr cənubda) yeni qaz-kompressor stansiyasının inşası üzrə işləri başa çatdırmağı planlaşdırır", - mənbə deyib.
ARDNŞ-nin məlumatında deyildiyi kimi, yeni stansiyanın inşasında layihə tapşırığı artıq hazırlanıb və onun inşası üçün lazımı avadanlıqların seçilməsi üzrə işlərə başlanılıb.
Hazırda Astarada 2005-ci ildə inşa edilən sutkada 2,2 milyon kubmetr gücə malik kompressor stansiyası fəaliyyət göstərir. Yeni stansiyanın gücü sutkada beş milyon kubmetr təşkil edəcək.
