Azərbaycan, Bakı, 30 mart / Trend , müxbir E.İsmayılov/
Ukraynadakı siyasi dəyişikliklər Odessa-Brodı neft kəməri layihəsinin həyata keçirilməsinə təsir etmir. Bunu ARDNŞ (Azərbaycan Respublikası Dövlət Neft Şirkəti) prezidenti Rövnəq Abdullayev çərşənbə axşamı deyib.
"Fikrimcə, layihəyə heç bir mənfi təsir yoxdur. Ukrayna müstəqil dövlətdir və Odessa-Brodı layihəsi dövlətin nəzarəti altındadır. Ölkə bu layihədən maksimum fayda əldə etməyə çalışır", - Abdullayev deyib.
Odessa-Brodı neft nəqliyyatı layihəsi Ukrayna NEZ-lərinə neft tədarükünü diversifikasiya etmək, ölkənin tranzit imkanlarını inkişaf etdirmək məqsədilə planlaşdırılıb. Odessa-Brodı neft kəmərinin tikintisi 2002-ci ilin mayında yekunlaşıb. Magistralın uzunluğu 674 km, borunun diametri 1020 mm-dir. Neft kəmərinin birinci növbəsinin və terminalın gücü ildə 9-14 milyon ton təşkil edir.
Bu marşrutda (Odessa-Brodı-Plots-Qdansk) Azərbaycan əsas tədarükçülərdən biri rolunu oynayır. Lakin Azərbaycan həmçinin tranzit ölkə kimi işləyə bilər. Azərbaycan bu boru kəməri vasitəsilə yalnız öz neftini deyil, həmçinin Mərkəzi Asiyanın, məsələn, Qazaxıstan neftini tədarük edə bilər.
Odessa-Brodı-Plots-Qdansk layihəsini inkişaf etdirən "Srmatia" şirkətinin iştirakçıları ARDNŞ, Gürcüstanın Georgian Oil and Gas Corporation Ltd, Ukraynanın "Ukrtransnafta", Polşanın "Przedsiebiorstwo Eksploatacji Rurociagow Naftowych Przyjazn S.A" və Litvanın "AB Klaipedos Nafta" şirkətləridir.
