Azərbaycan, Bakı, 20 aprel /Trend, müxbir A.Bədəlova/
"Nabucco Gas Pipeline International" marketinq şirkəti "Nabukko" qaz kəmərinin Türkiyə hissəsi üçün əsas və ətraflı injinirinq keçirilməsi üzrə tender elan edib. Bu barədə şirkətin rəsmi saytındakı məlumatda deyilir.
Dəyəri 7,9 milyard avro olan "Nabukko" layihəsi Yaxın Şərq və Xəzər regionundan Aİ ölkələrinə qaz nəqlini nəzərdə tutur. Uzunluğu 3,300 kilometrə yaxın olan "Nabukko" qaz kəməri Gürcüstan-Türkiyə və ya İran-Türkiyə sərhədindən başlayaraq, Türkiyə, Bolqarıstan, Rumıniya, Macarıstan ərazisilə Avstriyadan "Baumqarten" qazpaylaşdırıcı qovşağa kimi keçəcək.
"Nabucco Gas Pipeline International"ın İdarə Heyətinin direktoru Reynhard Mitçekin əvvəlcə bildirdiyi kimi, qaz kəmərinin cənub hissəsinin inşasına 2011-ci ildə başlanacaq. İnşa işləri başlayana kimi layihəyə dair mühüm məsələlərin bu ilin sonunadək həll edilməsi gözlənilir. Bunlar maliyyələşdirmə və borunun doldurulması üçün mənbələrin axtarışı, həmçinin mühəndis-texniki hazırlığa başlanılmasıdır.
"Nabukko" qaz kəməri layihəsi bu ilin may ayında ətraflı texniki injinirinq mərhələsinə çıxıb. Layihənin tranzit ölkələri Avstriya, Macarıstan, Rumıniya, Bolqarıstan və Türkiyədə qiymətləndirmə aparan və boru kəməri marşrutunun texniki detallarının öyrənməsi ilə məşğul olan injinirinq üzrə beş lokal subpodratçı müəyyən olunub. "Nabukko" boru kəmərinin inşasının ətraflı texniki planının hazırlanmasını Britaniyanın "Penspen" şirkəti həyata keçirir.
"Nabukko" layihəsinin rəsmi nümayəndəsi Kristian Dolezalın electron poçt vasitəsilə Trend-ə bildirdiyinə görə, tenderin qalibi olan şirkət qaz kəmərinin Ankaradan Türkiyənin şərq sərhədinə qədər olan hissəsinin injinirinqi ilə məşğul olacaq. Qaz kəmərinin Bolqarıstan sərhədindən Ankaraya kimi olan hissəsinin lokal injinirinqi tamamlanma mərhələsindədir.
Həmçinin, onun sözlərinə görə, tezliklə "Nabukko"nun digər iştirakçı dövlətlərində də ətraflı injinirinq işləri başa çatacaq.
Layihənin iştirakçıları OMV Gas GmbH (Аvstriya), Botaş (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan) və RWE-dir (Almaniya). İştirakçıların hər biri bərabər - 16,67 faiz paya malikdirlər. Laihənin ümumi dəyərinin 30 faizinə pay iştirakı əsasında "Nabucco Gas Pipeline International" sərmayə qoyacaq, qalan 70 faiz isə kreditlər hesabına ödənəcək.
