Azərbaycan, Bakı, 26 may /Trend/
ARDNŞ (Azərbaycan Respublikası Dövlət Neft Şirkəti) bu il Xəzərin Azərbaycan sektorundakı "Günəşli" yatağının azsulu hissəsində 3 yüksəkdebetli neft-qaz quyusunu istismara verməyi planlaşdırır. Bu barədə ARDNŞ-nin çərşənbə günü yaydığı məlumatda deyilir. Bu quyuların qazılmasını "Kompleks qazma işləri" Tresti həyata keçirəcək.
Məlumatda deyildiyi kimi, quyuların "Günəşli-6", "Günəşli-10" və "Günəşli-19" platformalarından istismara verilməsi planlaşdırılıb. Hər quyunun ehtimal olunan gündəlik debeti 40 ton neft və 250 min kubmetr qaz həcmində proqnozlaşdırılır.
Eləcə də Xəzərin Azərbaycan sektorundakı eyniadlı yataqda yerləşən "Bahar-76B" platformasından yeni quyunun qazılması ilə bağlı işlər görülür. Bu quyunun ehtimal olunan gündəlik debeti 30 ton qaz kondensatı və 300 kubmetr qaz həcmindədir.
Məlumatda deyildiyi kimi, 2010-cu ildə "8 Mart" dəniz yatağında yeni hasilat quyusunun istismara verilməsi nəzərdə tutulub. Bu quyudan gündəlik 40 ton kondensat və 350 min kubmetr qaz hasil olunması planlaşdırılır.