Türkmənistan, Aşqabad, 16 iyun /Trend, müxbir H.Həsənov/
Aşqabadda Türkmənistan və İran arasında energetika sahəsində qarşılıqlı anlaşma və əməkdaşlıq haqqında memorandumun imzalanması planlaşdırılır. Bu barədə rəsmi türkmən mənbəsi məlumat verib.
İmzalanma İranın neft naziri Məsud Mirkazıminin çərşənbə günü başlamış səfəri çərçivəsində nəzərdə tutulub. O, günün birinci yarısında Türkmənistan Prezidenti Qurbanqulu Berdiməhəmmədov tərəfindən qəbul edilib.
İran türkmən qazını iki qaz borusu vasitəsilə alır və sərhədyanı əyalətlərini yanacaqla təmin etmək üçün qazın həcminin ildə 20 milyard kubmetrədək artırılacağına ümid edir.
Tehran Türkmənistanın böyük "Cənub Eloten" yatağını işlətməkdə marağı olduğunu dəfələrlə bildirib. Məlum olduğu kimi, ilkin mərhələdə podratçı sifarişləri Cənubi Koreya və Birləşmiş Ərəb Əmirlikləri şirkətləri alıb.
İran türkmən qazını Türkiyə və Avropaya tədarük etmək üçün öz ərazisinin tranzit qismində istifadə edilməsini də təklif edir.
