Azərbaycan, Bakı, 21 iyun /Trend, müxbir Y.Ostapenko/
GE Oil & Gas "BP Azerbaijan" ilə sazişlər üzrə yeni avadanlığın təchizatının artırılmasına ümid edir. Adıçəkilən şirkət "Azəri-Çıraq-Günəşli" neft yataqlar blokunda və "Şahdəniz" qaz-kondensat yatağında işləməklə ölkədə ən iri xarici operatorudur.
"Biz BP-nin Xəzər dənizində, xüsusilə də "Şahdəniz"də yataqların işlənməsi üzrə apardığı işlərdə sıx əməkdaşlıq edirik. BP-nin Xəzər dənizində layihələrinin inkişafına uyğun biz yeni avadanlığın təchizatını artırmaqla onlarla əlaqələri genişləndirməyi planlaşdırırıq", - bazar ertəsi Trend-ə GE Oil & Gas-ın qazma və hasilat avadanlığı üzrə Global Services bölməsinin rəhbəri Nil Sonders deyib.
ABŞ-ın GE Oil & Gas çoxsahəli korporasiyası bazar ertəsi Bakı yaxınlığında yeni Global Services rəsmi mərkəzini açıb. Mərkəz təmir, xidmət, qazma avadanlıqlarının bərpası və quyuların istismarını opimallaşdırmağa imkan verəcək.
Sondersin sözlərinə görə, dəyəri 6 milyon dollar olan Global Services mərkəzi regional neft-qaz əməliyyatlarına, xüsusilə də Qazaxıstan və Türkmənistanda aparılan əməliyyatlara kömək edəcək.
"Azərbaycanda daha iri layihələrdə iştirak etməyə nail olsaq, biz xidmət imkanlarımızı genişləndirməli olacağıq və heç şübhəsiz ki, gələcək investisiyaları nəzərdən keçirəcəyik", - Sonders əlavə edib.
Sonders GE-nin qlobal fəaliyyətinə dünya maliyyə böhranının təsirindən danışaraq vurğulayıb ki, şirkət böhranın nəticələrini özündə hiss edib.
"GE şirkətinin enerji qolları böhran dövrünü yaxşı yaşaya bildi. Neft-qaz sektoru 2008-ci və 2009-cu illərin payızından bəri hətta artıb. Biz "fırtınaya" kifayət qədər yaxşı dözdük", - Sonders bildirib.
Onun fikrincə, enerjiyə tələbat uzunmüddətli perspektivdə olacaq.
"Biz inanırıq ki, tələbat yenidən artacaq və enerjiyə olan tələbatda gələcək artım üçün yaxşı vəziyyətdə olduğumuzu hiss edirik", - Sonders qeyd edib.
GE Oil & Gas-ın dünya üzrə ştatında 12 min əməkdaşı var və dünyanın 100-dən çox ölkəsində xidmətlər təqdim edir.
