Azərbaycan, Bakı, 9 iyul /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) İğdır (Türkiyə) və Ermənistanın Azərbaycan topraqlarını işğal etməsi nəticəsində blokadada olan Naxçıvan Muxtar Respublikasındakı (NMR) Sədərəyi birləşdirəcək yeni qaz kəmərinin tikintisi layihəsinin texniki iqtisadi əsaslandırmasını (TİƏ) hazırlayıb. Bu barədə cümə günü ARDNŞ-dən məlumat verilib.
"İğdır-Naxçıvan qaz kəməri çərçivəsində TİƏ artıq hazırlanıb", - mənbə bildirib. O, layihə çərçivəsində işlərin başlanacağı müddəti göstərməyib.
Bir müddət əvvəl ARDNŞ prezidenti Rövnəq Abdullayevin dediyinə görə, İğdır-Naxçıvan yeni qaz kəmərinin bütün xərcləri bir qədər əvvəl Azərbaycanla Türkiyə arasında imzalanan memoranduma görə şirkət öz üzərinə götürür.
Yeni qaz kəmərinin tikintisi NMR-in qazla təmin olunması üçün lazımdır. Qaz kəmərinin uzunluğu (altı qazpaylayıcı stansiya da daxil olmaqla) 180 kilometrdir. Hazırda Azərbaycan NMR-i İranla aparılan svop əməliyyatlar hesabına qazla təmin edir. Bu əməliyyatlar çərçivəsində Azərbaycan İrana sutka ərzində 1-1,2 milyon kubmetrə yaxın qaz nəql edir.
