Azərbaycan, Bakı, 27 iyul /Trend, müxbir E.İsmayılov/
ARDNŞ Heydər Əliyev adına Dərin Özüllər Zavodundan dənizə "Neft Daşları-2585" dördbloklu platformasının daha bir blokunu göndərib. Blok Xəzər dənizinin Azərbaycan sektorunda eyniadlı dəniz yatağında quraşdırılacaq. Bu barədə çərşənbə axşamı ARDNŞ-dəki mənbə bildirib.
Onun sözlərinə görə, hazırda Dərin Özüllər Zavodu platformanın üçüncü blokunun tikintisi üzrə işləri davam etdirir. İşlərin yaxın vaxtlarda başa çatdırılması planlaşdırılıb.
"Say etibarı ilə ikinci olan blok yatağa göndərilib. Hazırda zavodda daha bir blokun tikintisi üzrə işlər görülür. Görüləsi işlərin ümumi həcmindən 20 faizi qalıb. Bu işlər yay mövsümünün sonunadək başa çatdırıla bilər", - mənbə deyib.
Qalan dördüncü blokun tikintisi Zığda yerləşən "Neftqaztikinti" Trestinin tikinti-montaj meydançasında aparılır.
64 metr hündürlüyü olan platforma suyun 46 metr dərinliyində, "Neft Daşları-1887" beşbloklu platformanın 500 metrliyində yerləşəcək. Yeni platformada 12 quyunun qazılması planlaşdırılıb. Bu quyulardan sutkada 580 ton neftin hasil edilməsi planlaşdırılıb.
Yeni platformalar neft hasilatının sabit həcminin saxlanması və ehtiyatları xeyli tükənən "Neft Daşları" yatağından ildə hasilatın 1,2 milyon tona çatdırılması üçün lazımdır. "Neft Daşları" Azərbaycanın karbohidrogen hasilatına başladığı ilk dəniz yatağıdır.
Əvvəllər ARDNŞ prezidenti Rövnəq Abdullayevin dediyinə görə, "Neft Daşları" yatağının hasil edilən neft-qaz ehtiyat qalıqları 182 milyon ton nefti ötür. Bu yatağın geoloji ehtiyatlarının həcmi 365 milyon ton təşkil edir. Yatağın işlənməsi üzrə qüvvədə olan layihəyə əsasən, "Neft Daşları" yatağının işlənməsi 2035-ci ildə başa çatmalıdır.
