Azərbaycan, Bakı, 18 sentyabr /Trend, müxbir E.İsmayılov/
Cari ilin sonunadək Xəzərin Azərbaycan sektorunda yerləşən "Şadəniz-2" qaz kondensatı yatağının işlənməsinin ikinci mərhələsinin son konsepsiyası qəbul ediləcək. Bu barədə şənbə günü ARDNŞ rəhbəri Rövnəq Abdullayev deyib.
Onun sözlərinə görə, konsepsiyanın son variantında prinsipal dəyişikliklər olmayacaq. ARDNŞ rəhbərinin qeyd etdiyinə görə, "Şahdəniz-2" çərçivəsində işlər artıq qismən başlayıb. Bu yatağın işlənməsinin ikinci mərhələsindən potensial qaz alıcıları ilə danışıqlar da davam etdirilir.
"Şahdəniz-1"in operatoru olan bp şirkəti əsas konsepsiya kimi bir platformanın tikintisini, quyuda qazma və hasilatın sualtı avadanlıq vasitəsilə həyata keçirilməsini nəzərdən keçirir.
"Şahdəniz-2"dən hasilatın başlanılması 2016-cı ilin sonunda, 2017-ci ilin əvvəlində gözlənilir.
Yatağın işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 25 milyard kubmetrədək çatdırmaq mümkün olacaq.
Hazırda qaz Gürcüstan və Türkiyəyə Cənubi Qafqaz qaz kəməri ilə nəql olunur. Sazişə əsasən, "Şahdəniz" layihəsinin işlənməsinin I mərhələsi çərçivəsində Türkiyə 6,6 milyard kubmetr qaz alacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%. "Şahdəniz" yatağında bu ilə proqnozlaşdırılmış hasilat 7,84 milyard kubmetr qaz təşkil edir.
