Azərbaycan, Bakı, 18 noyabr /Trend/
Azərbaycan "Nabukko" boru kəməri konsorsiumundan yaxın bazarlara çıxış əldə etmək istəyir. Bu barədə ARDNŞ-nin (Azərbaycan Respublikası Dövlət Neft Şirkəti) marketinq və investisiya üzrə vitse-prezidenti Elşad Nəsirov "Europeanenergyreview" portalına müsahibəsində deyib.
Onun sözlərinə görə, Azərbaycan "Nabukko" qaz kəməri üzrə Aİ-yə öz qazının nəqli əvəzində nəinki rəqabət qabiliyyətli tariflər, eləcə də yaxın bazarlara çıxış əldə etmək istəyir.
Bu proses yalnız Türkiyə, Bolqarıstan, Rumıniya, Macarıstan və Avstriya kimi "Nabukko" layihəsinin iştirakçı ölkələri ilə məhdudlaşmır. Qaz kəmərində əlavə işlərin aparılması zamanı bu proseslə digər Balkan ölkələri əlaqələndilə bilər. Bu ölkələr kiçik həcmdə Azərbaycan qazının alınmasında maraqlı olduqlarını bəyan ediblər. Həmçinin, "Nabukko" boru kəməri üzrə Azərbaycan qazı Yunanıstana da nəql oluna bilər. Bu, digər marşrutları da əhatə edir - ITGI qaz kəməri üzrə Azərbaycan qazının nəqli yalnız Yunanıstan və İtaliya ilə məhdudlaşmayacaq, eləcə də Bolqarıstan, Makedoniya, Albaniya və Serbiyaya tədarük olunacaq.
"Azərbaycan tranzit tarifinin dəyərinin qaz kəmərinin tam doldurulması şərti ilə hesablanacağı təqdirdə, "Nabukko" qaz kəməri üzrə 10 milyard kubmetr qazının nəqlinə ödəniş edəcək", Nəsirov deyib.
"Əgər biz boru kəmərinin yarısını doldurmağa razılıq verəriksə, "Nabukko" ikinci mənbəni axtarmaq üçün stimuldan məhrum olacaq. "Nabukko" boru kəməri üzrə qazın nəqlinə yüksək tarif ödəməli olsaq, biz qazı yüksək qiymətlə Avropa istehlakçılarına sata bilməyəcəyik, çünki Aİ-də bazarın səviyyəsi bərabərdir", - ARDNŞ-nin vitse-prezidenti deyib.
Xərclər istehsalçılar və uzunmüddətli perspektivdə Azərbaycan hesabına ödəniləcək. "Biz buna gedə bilmərik", - Nəsirov deyib.
"Şahdəniz" üzrə tərəfdaşların məqsədi - 2011-ci il martın 31-dək potensial alıcılarla razılıqların əldə edilməsi, Gürcüstan və Türkiyə vasitəsilə qazın nəqli üçün bütün lazımi sənədlərin imzalanmasıdır", - o bildirib.
Onun sözlərinə görə, "Şahdəniz" yatağının ikinci mərhələsinin işlənməsi, investisiya qoyuluşu prosesi, bu yataqdan dünya bazarlarına qazın çıxışı və digər məsələlər uyğunlaşdırılmalıdır.
Hazırda qazın alınması üzrə müxtəlif variantlar təklif edən istehlakçılarla danışıqlar aparılır, onların arasında "Nabukko", ITGI, TAP qaz kəməri üzrə, həmçinin Azərbaycanda qazın alınması imkanı var. Bu proses daha dəyərli ticari təkliflərin aşkar olunması və Türkiyə vasitəsilə Avropaya hansı qaz nəqli marşrutunun daha effektiv tranzit və nəqliyyat tariflərini təmin etməsini müəyyən etmək məqsədilə aparılır.
Azərbaycandan qazın mümkün nəqli yalnız "Şahdəniz" yatağı ilə məhdudlaşmır. Qazın nəqli başqa yataqlardan da həyata keçirilə bilər. Lakin söhbət zəmanətdən gedirsə, respublika yalnız "Şahdəniz"dən qaz nəqlinə zəmanət verir. Bununla yanaşı, əgər qazın əlavə tədarükü olarsa, digər marşrutlar üzrə ixrac oluna bilər.