Azərbaycan, Bakı, 24 dekabr / Trend, müxbir E.İsmayılov /
Türkiyənin "Botaş" Dövlət Boru Kəməri Şirkəti ölkənin "Şahdəniz" qaz-kondensat yatağının birinci fazasının işlənməsi zamanı aldığı qazın qiymət fərqinin ödənilməsi çərçivəsində 500 milyon dollar məbləğində birinci tranşı ödəyib. Bu barədə cümə günü ARDNŞ-nin yüksək vəzifəli nümayəndəsi məlumat verib.
ARDNŞ nümayəndəsi bildirib ki, "Şahdəniz" qaz-kondensat yatağının birinci fazasının işlənməsi zamanı aldığı qazın qiymət fərqinin ödənilməsi çərçivəsində "Botaş" daha 900 milyon dollar ödəməlidir.
Bundan əvvəl tərəflər "Şahdəniz" yatağının işlənməsinin birinci və ikinci mərhələsində qazın dəyəri, eləcə də Azərbaycan qazının Türkiyə ərazisindən tranzitinin şərtləri məsələsində razılığa gəliblər. Hazırda tərəflər əldə olunan razılaşmanı rəsmən möhkəmləndirəcək sənədlərin hazırlanması üzrə iş aparırlar.
Tərəflər arasında razılaşma əldə olunanadək Azərbaycan qazı Türkiyəyə 1000 kubmetri 120 dollar qiymətinə satılıb. Bununla yanaşı, Türkiyənin daxili bazarında istehlakçılar üçün qazın qiyməti 1000 kubmetr üçün 300 dollardan artıq (rəqəmlər Türkiyənni Botaş şirkətinin rəsmi saytından götürülüb) təşkil edir.
Türkiyə ilə imzalanan müqavilədə göstərildiyi kimi, "Şahdəniz" qazının dəyərinə satışın başlamasından bir il sonra baxmaq olar.
Müqaviləyə əsasən, Türkiyə "Şahdəniz" yatağının işlənməsinin birinci mərhələsində ildə 6,6 milyard kubmetr qaz alır (ehtiyatların ümumi həcmi 1,2 trilyon kubmetr qiymətləndirilir).
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
