Azərbaycan, Bakı, 5 aprel /Trend, müxbir E.İsmayılov/
Almaniyanın ILF şirkəti 2012-ci ilin iyununda Brodı-Plosk boru kəməri layihəsi çərçivəsində ətraf mühitə təsir haqqında hesabatın (ƏMTH) hazırlanmasını başa çatdıracaq. Bu barədə çərşənbə axşamı Trend-ə "Sarmatia" boru kəməri müəssisəsinin baş direktoru Sergey Skripka məlumat verib.
"Sarmatia" ILF-dən olan məsləhətçilərlə birlikdə ətraf mühitə təsir haqqında hesabatın hazırlanmasına başlayıb. Göstərilən sənədin 2012-ci il iyunun sonunda hazır olacağı gözlənilir", - Skripka bildirib.
Onun sözlərinə görə, bir müddət əvvəl hazırlanan layihənin texniki-iqtisadi əsaslandırması (TİƏ) birinci səviyyəli yoxlamadan keçib, müsbət qiymət alıb. TİƏ həmçinin qiymətləndirilmək üçün Avropa Komissiyasının tapşırığı ilə işləyən JASPERS ekspertlərinə verilib.
"[...] "Brodı-Adamova zastavası" gələcək neft kəmərinin yolunun seçimi üzrə tədqiqatlara hazırlıq başa çatıb. Yolun uzunluğu 377 kilometr təşkil edəcək ki, bunun 120 kilometri Ukrayna, 257 kilometri isə Polşa ərazisində tikiləcək", - Skripka bildirib.
Brodı-Plosk neft kəmərinin tikinti layihəsi Avropa İttifaqının "İnfrastruktur və ətraf mühit" əməliyyat proqramına prioritet layihələr kimi daxil edilib. Bu proqram çərçivəsində layihə üçün 495 milyon zlot (177 milyon dollara yaxın) məbləğində vəsait ehtiyatda saxlanıb. Bu maliyyələşməni almaq üçün (bu tam maliyyələşmə deyil) beynəlxalq boru kəməri müəssisəsi bir sıra şərtləri yerinə yetirməlidir. Bu şərtlərin bir hissəsi şirkətin əvvəllər proqramın koordinatoru qismində çıxış edən Krakov Neft və Qaz İnstitutu ilə imzaladığı ilkin müqavilədə göstərilib. İnstitut proqramın şərtlərinin yerinə yetirilməsinə nəzarət edir.
"Sarmatia" şirkəti "Ukrtransnafta" ASC və Polşanın "PERN Przyjazn" şirkətləri tərəfindən 2004-cü il iyulun 12-də, Odessa-Brodı neft kəmərinin Polşanın Plosk şəhərinədək layihələndirilməsi və tikilib başa çatdırılması üçün sərmayələrin cəlb edilməsi məqsədilə yaradılıb.
Odessa-Brodı neft nəqli layihəsi neftin Ukrayna NEZ-lərinə tədarükünün diversifikasiyası və ölkənin tranzit imkanlarının artırılması məqsədi ilə planlaşdırılıb. Odessa-Brodı neft kəmərinin tikintisi 2002-ci ilin aprel ayında başa çatıb. Magistral 674 km uzunluğa malikdir, borunun diametri isə 1020 mm-dir. Neft kəməri və terminalın gücü il ərzində 9-14 milyon ton təşkil edir.
"Sarmatia"nın iştirakçıları ARDNŞ (Azərbaycan Respublikası Dövlət Neft Şirkəti), Gürcüstanın "Georgian Oil and Gas Corporation Ltd." (GOGC), Ukraynanın "Ukrtransnafta", Polşanın "Przedsiebiorstwo Eksploatacji Rurociagow Naftowych Przyjazn S.A." və Litvanın "AB Klaipedos Nafta" şirkətləridir. Əsas iştirakçıların hər birinin payı 24,75 faiz, Litva şirkətinin payı isə bir faiz təşkil edir.