Azərbaycan, Bakı, 18 may /Trend, müxbir E.İsmayılov/
"Chirag oil project" ("Azəri-Çıraq-Günəşli" yataqlar blokunda neft hasilatının artırılması) layihəsinin reallaşdırılması çərçivəsində ARDNŞ-nin (Azərbaycan Respublikası Dövlət Neft Şirkəti) Heydər Əliyev adına Bakı Dərin Özüllər Zavodunun modernləşdirilməsi üzrə proqramı başa çatıb. Bu barədə AÇG-nin işlənməsinin operatoru olan Britaniyanın BP şirkətinin hesabatında deyilir.
Hesabatda deyildiyi kimi, zavodda görülən işlər Azərbaycanın hüdudları daxilindəki platformaların dayaq bloklarının quraşdırılması üzrə bütün əməliyyatları yerinə yetirməyə imkan verir.
Eləcə də ölkə daxilindəki işlərin həcminin artırılması məqsədilə Amec-Tekfen-Azfen (ATA) alyansının tikinti-quraşdırma meydanı üzrə proqramının həyata keçirilməsi ilə bağlı işlər də başa çatıb.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.
Layihənin həyata keçirilməsi çərçivəsində 300 milyon barel neft hasilatı planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
