Azərbaycan, Bakı, 7 iyun /Trend, müxbir E.İsmayılov/
AGRI (Azerbaijan-Georgia-Romania Interconnector) layihəsi Avropaya qaz tədarükünə istiqamətlənmiş boru kəməri layihələrindən əvvəl reallaşdırıla bilər. Trend-in məlumatına görə, bu barədə çərşənbə axşamı Gürcüstanın energetika naziri Aleksandr Xetaquri bildirib.
"Bu mühüm layihədir və bunu qaz kəməri layihələrindən, eləcə də "Nabukko"dan xeyli əvvəl reallaşdırmaq mümkündür", - Xetaquri bildirib.
Onun sözlərinə görə, bir ay ərzində layihənin iştirakçısı olan dörd ölkə tərəfindən yaradılan şirkət TİƏ-nin hazırlanmasına dair tender elan edəcək, artıq payızda onun nəticələri məlum olacaq.
Bir az əvvəl Rumıniyada AGRI layihəsinin reallaşdırılması üçün birgə müəssisə qeydiyyatdan keçib. BM-nin iştirakçıları kimi Rumıniyanın ROMGAZ, Gürcüstanın neft-qaz korporasiyası, ARDNŞ (Azərbaycan Respublikası Dövlət Neft Şirkəti) və MVM çıxış ediblər. BM-in hər bir iştirakçısı 25 faizlik iştirak payına malikdir.
Nazirin sözlərinə görə, TİƏ-nin hazırlanması 11 ay vaxt aparacaq, bundan sonra şirkət işlərin başqa mərhələsinə, eləcə də layihənin maliyyələşdirilməsi mənbələrinin axtarışına keçəcək.
AGRI layihəsi Azərbaycan qazının Gürcüstanın Qara dəniz sahilində qaz kəməri üzrə nəqlini nəzərdə tutur ki, bu qaz da xüsusi terminalda mayeləşdirilərək, tankerlərlə Rumıniyanın Konstansa limanı terminalında nəql olunacaq. Gələcəkdə maye qaz təbii qaz halına gətirilərək, ölkə ərazisində mövcud olan qaz infrastrukturu vasitəsilə Rumıniya və digər Avropa ölkələrinin qaz tələbatını ödəmək üçün istiqamətlənəcək.
Gözlənilir ki, Türkmənistan layihədə tədarükçü kimi iştirak etməklə Xəzər ilə maye qazı onun sonradan Avropaya tranziti üçün Azərbaycana tədarük edə bilər.
AGRI layihəsinin dəyəri 1,2 milyard avro və 4,5 milyard avro arasında dəyişə bilər.