Azərbaycan, Bakı, 7 iyun /Trend, müxbir E.İsmayılov/
Gürcüstan 2012-ci il mayın sonunadək Azərbaycan-Gürcüstan-Türkiyə enerji körpüsünün yaradılması çərçivəsində tikinti işlərini başa çatdırmağı planlaşdırır. Bu barədə çərşənbə axşamı Gürcüstanın energetika naziri Aleksandr Xetaquri bildirib.
"Bizim tərəfimizdən fəal iş aparılır və artıq tikintiyə başlanılıb, 2012-ci il mayın sonunadək biz hazır olacağıq", - nazir bildirib.
Onun sözlərinə görə, Azərbaycan tərəfi hazırda layihələndirmə işləri aparır, yaxın vaxtlarda tikintiyə başlanacaq.
Bir müddət əvvəl "Azərenerji" SC-nin prezidenti Etibar Pirverdiyev deyib ki, Azərbaycan-Gürcüstan-Türkiyə enerji körpüsünün yaradılması Avropaya 600-700 MVt gücündə elektrik enerjisi nəql etməyə imkan verəcək. Azərbaycanda bu layihə çərçivəsində Mingəçevir şəhərindən Azərbaycanın Gürcüstanla sərhədinədək 500 kilovoltluq elektrikötürücü xəttin (EÖX) tikintisi nəzərdə tutulur.
2010-2015-ci illərə planlaşdırılan layihələr çərçivəsində Azərbaycanın elektrik enerjisi ötürücü sistemində yeni transformatorların ümumi gücü 4000 MBA təşkil edəcək, 110-500 kilovoltluq xətlərin uzunluğu isə təxminən 1500 kilometr artacaq.