Azərbaycan, Bakı, 10 avqust /Trend/
Azərbaycan Sənaye və Energetika Nazirliyi sentyabrın 1-də Avropa Komissiyasının İNOGATE Proqramı çərçivəsində "Azərbaycanın Xəzər dənizi ərazisində külək enerjisi potensialının öyrənilməsi" layihəsinin təqdimatını keçirməyi planlaşdırır. Trend-in məlumatına görə, bu barədə nazirliyin çərşənbə günü yaydığı məlumatda deyilir.
"Yekun hesabat layihəsi artıq hazırdır. Hesabatın təqdimatının bu il sentyabrın 1-də keçirilməsi planlaşdırılır", - məlumatda deyilir.
Hesabatın təqdimatında danimarkalı ekspertləri Kim Jansen və Jesper Thisen iştirak edəcəklər. Eyni zamanda, təqdimatda Azərbaycan Milli Elmlər Akademiyası, İqtisadi İnkışaf Nazirliyi, Ekologiya və Təbii Sərvətlər Nazirliyi, Dövlət Neft Şirkəti, Energetika Elmi Tədqiqat Layihə İnistitunun rəsmi şəxsləri iştirak edəcəklər.
INOGATE beynəlxalq proqramı Avropa İttifaqı ilə tərəfdaş ölkələr - Ukrayna, Gürcüstan, Azərbaycan, Moldova, Qazaxıstan, Belarus, Qırğızıstan, Özbəkistan, Tacikistan, Türkmənistan və Ermənistanla enerji sahəsində əməkdaşlığı nəzərdə tutur.
1995-ci ildə yaradılan INOGATE əvvəlcə Avropaya dövlətlərarası neft və qaz nəqli üçün Aİ mexanizminə xidmət göstərib. 2004-cü ildə Bakıda konfransdan və 2006-cı ildə Astana konfransından sonra proqramın fəaliyyət proqramı əhəmiyyətli dərəcədə genişlənib.
Hazırda INOGATE dörd əsas istiqamət üzrə fəaliyyət göstərir: enerji təhlükəsizliyini gücləndirilməsi, enerji bazarlarının yaxınlaşması, energetikanın davamlı inkişafı və enerji layihələrinə investisiyaların cəlb edilməsi.
2007-ci ildən INOGATE Avropa Qonşuluq və Tərəfdaşlıq Təşəbbüsünü (ENPI) maliyyələşdirir.
