Azərbaycan, Bakı, 14 noyabr /Trend, müxbir E.İsmayılov/
ARDNŞ (Azərbaycan RespublikasI Dövlət Neft Şirkəti) yanında "Azəriqaz" İstehsalat Birliyi qazın paylaşdırılmasının yeni modelinin işlənməsi və onun texniki-iqtisadi əsaslandırılması (TİƏ) bazasında hazırlıqlar üçün Almaniyanın "E.ON Ruhrgas AG" şirkətinə məlumatlar təqdim edəcək. Bu barədə bazar ertəsi Trend-ə ARDNŞ-dəki mənbə deyib.
TİƏ Bakı şəhərində və Abşeron yarımadasında qaz təchizatı sisteminin yenidən qurulması layihəsi çərçivəsində hazırlanacaq.
"İstehsalat Birliyi mərhələli olaraq Bakı və Abşeron yarımadasının paylayıcı şəbəkəsinin və qaz təsərrüfatının vəziyyəti ilə bağlı məlumatlar, qazın orta aylıq və orta illik tədarükü normaları, qaz kəmərlərinin uzunluğu, eləcə də yeni modelin hazırlanması üçün lazım olan geotexnoloji məlumatlar və digər materiallar təqdim edəcək", - mənbə bildirib.
TİƏ yeni model əsasında hazırlanacaq. Sonra tərəflər paylayıcı sistemin yenidən qurulması və modernləşdirilməsi üzrə işlərin aparılması məsələləri ilə məşğul olacaq müştərək müəssisə yarada biləcəklər.
Mənbənin sözlərinə görə, TİƏ-nin hazırlanması gələn il başa çatacaq. "E.ON Ruhrgas AG" şirkəti ilə müqaviləyə əsasən, TİƏ altı ay ərzində hazırlanacaq.
Layihə Bakı şəhəri və Abşeron yarımadasında qaz itkisinin qarşısının alınması və minumuma endirilməsi, habelə əhalinin artımı və sənayenin davamlı inkişafi nəticəsində gələcəkdə daha da yüksələcək qaz tələbatını ödəmək üçün mövcud qaz təchizatı şəbəkəsinin genişləndirilməsi, müasirləşdirilməsi və yenidən qurulmasını həyata keçirmək məqsədilə texniki-iqtisadi əsaslandırmanın hazırlanmasını nəzərdə tutur.
TİƏ Almaniya və digər Qərb ölkələrində istifadə olunan norma və standartlara uyğun şəkildə hazırlanacaq.
Bakı və Abşeron yarımadasının qaz sistemi ölkədə ən iridir və təxminən 650 min abunəçini əhatə edir. Sistemin yenidən qurulması və modernləşdirilməsi üçün mövcud infrastrukturun 90 faizi yenilənməlidir.
Ümumilikdə layihənin həyata keçirilməsinə 800-900 milyon avro xərclənə bilər.
