Azərbaycan, Bakı, 21 noyabr /Trend, müxbir Emil İsmayılov/
2014-cü ilin yanvar-sentyabr aylarında Səngəçal terminalından boru kəmərləri və dəmiryol vasitəsilə 227 milyon barel neft ixrac olunub. 2013-cü ilin müvafiq dövründə bu göstərici 213,5 milyon barel təşkil edib. Trend-in məlumatına görə, bu barədə BP şirkətinin 2014-cü ilin yanvar-sentyabr aylarının yekunu üzrə hesabatında deyilir.
Məlumata görə, 2014-cü ilin üç rübü ərzində terminal 227 milyon barel neft (o cümlədən 198 milyon barel Bakı-Tbilisi-Ceyhan (BTC), 24 milyon barel Qərb İxrac Boru Kəməri (Bakı-Supsa) marşrutu, 4 milyon barel dəmiryol, 1,4 milyon barel kondensat isə BTC vasitəsilə) ixrac edib.
2013-cü ildə Səngəçal terminalından boru kəmərləri və dəmiryolla 286,2 milyon barel neft, 2012-ci ildə isə 282,9 milyon barel neft ixrac edilmişdi.
Eləcə də ilin ilk 9 ayında terminaldan sutkalıq qaz ixracının həcmi 26,35 milyon kubmetr, 2013-cü ilin analoji dövründə isə 26,4 milyon kubmetr təşkil edib.
Terminalın texniki emal sistemlərinin gündəlik gücü hazırda 1,2 milyon barel neft və "Şahdəniz" qazı üçün təqribən 970 milyon standart kubfut və ya 27,4 milyon standart kubmetrdir, ümumi qaz emalı və ixracı gücü isə (AÇG səmt qazı da daxil olmaqla) gündəlik təqribən 41,5 milyon standart kubmetr təşkil edir.