Azərbaycan-Hollandiya Birgə Müəssisəsi (BM) AzeriFugro Bakıdakı laboratoriyanın bazasında Türkmənistanın "Blok-1" yatağında quyuların qazılması zamanı əldə olunan süxur nümunələrinin sınağını keçirir. Bu barədə Trend ə AzeriFugro BM-dən bildiriblər.
AzeriFugro BM Xəzər dənizində əsas etibarilə xarici şirkətlərə tədqiqat xcidmətləri göstərir. Bundan əvvəl AzeriFugro "Cümşüd İbrahimov" ixtisaslaşdırılmış gəmisinin tam təkmilləşdirilməsini nəzərdə tutmuşdu. Lakin sonradan BM tədqiqat işlərinin keçirilməsi ilə bağlı xarici şirkətlər tərəfindən zəmanətin olmaması üzündən bu layihədən imtina edib.
AzeriFugro şirkətinin nümayəndəsinin sözlərinə görə, hazırda yoxlamadan keçirilən süxurların əldə olunduğu quyuların qazılması ixtasaslaşdırılmış Markub gəmisi tərəfindən həyata keçirilib. "Biz bu işlərin noyabrda başa çatacağını ehtimal edirik", - deyə AzeriFugro-dan bildiriblər.
Qeyd edək ki, BM həmçinin Rusiyanın LUKOIL şirkəti tərəfindən "Yalama" perspektiv strukturunda ikinci kəşfiyyat quyusunun qazılmasının uğurla başa çatmasından və burada cəlbedici karbohidrogen ehtiyatlarının aşkar olunmasından sonra yataqda geotexniki tədqiqatların aparılacağına ümid edir.