İqtisadi İnkişaf Nazirliyi Azərbaycanda böyük neft-kimya kompleksi tikintisinin texnik-iqtisadi əsaslandırmasının hazırlığı üçün məsləhətçinin cəlb olunması haqqında qərar qəbul edib. Bu barədə Trend ə iqtisadi inkişaf naziri Heydər Babayev bildirib. Azərbaycanda kompleksin yaradılması üzrə təkliflər Amerika şirkətlərindən daxil olub. .Babayevin sözlərinə görə, tezliklə investisiya şirkəti müqavilə bağlayacağı məsləhətçinin adını elan edəcək.
"Onlar mal satışının təmin edilməsi ilə istehsalatın yerinin, şəraitinin və həcminin müəyyən edilməsi ilə bağlı TİƏ işləyib hazırlayacaqlar. Və bu zaman elə prinsip olmalı deyil ki, həmin mal yaxşı satılırsa, o zaman məhz həmin məhsulu istehsal etmək lazımdır", - deyə nazir qeyd edib.
Yeni neft-kimya kompleksinin tikintisi çərçivəsində Əbu-Dabidə bu şirkətlərin analoji layihələrinin tətbiqi ilə tanış olmaq üçün həmin ölkəni ziyarət etmək nəzərdə tutulub. Onların dünyanın müxtəlif ölkələrində böyük zavodları var və onlar Azərbaycana böyük maraq göstərirlər.
Neft-kimya kompleksinin Azərbaycan dövlət investisiya şirkətinin pay iştirakı hesabına yaradılma ehtimalı da istisna edilmir.
Kompleksin yaradılmasına qoyulan sərmayələrin təxmini həcmi 500-600 mln. ABŞ dolları təşkil edir. Amerikalıların yeganə şərti xammalın fasiləsiz tədarükü üçün Azərbaycan höküməti tərəfindən dövlət zəmanətinin verilməsidir.