Azərbaycan Dövlət Neft Fondunun icraçı direktoru Şahmar Mövsümov ABŞ-ın Ticarət və İnkişaf Agentliyinin MDB üzrə bölgə direktoru Deniel Staynla görüşüb. Trend xəbər verir ki, bu barədə ARDNF-dən məlumat verilib.
Görüş zamanı ARDNF-in institusional inkişafının təkmilləşdirilməsi layihəsinin ikinci mərhələsinin həyata keçirilməsi üçün TDA qrantın verilməsi barədə ilkin razılıq əldə olunub. Birinci mərhələ Overture Financial Services tərəfindən 19 may 2004-cü ildə imzalanmış sazişə əsasən ayrılmış TDA qrantı hesabına həyata keçirilib.
Ş. Mövsümov birinci mərhələnin Neft Fondu üçün faydalı olduğunu və uğurla başa çatdığını qeyd edib. D. Stayn isə, öz növbəsində, layihənin Agentlik tərəfindən maliyyələşdirilən və Azərbaycanda həyata keçirilən ən uğurlu layihələrdən biri olduğunu bildirib.
Layihənin Overture Financial Services şirkəti tərəfindən həyata keçiriləcək ikinci mərhələsində mühasibatlıq sisteminin təkmilləşdirilməsini, investisiya portfelinin idarə olunmasını və gəlirliliyinin qiymətləndirilməsini, menecerlərin idarə olunması və risklərin qiymətləndirilməsi sistemlərinin qurulmasını həyata keçirən şirkətin (sistemin) seçilməsi üçün Neft Fonduna məsləhət xidmətlərinin göstərilməsi nəzərdə tutulur.
