BP şirkəti "Şahdəniz" layihəsinin ikinci mərhələsinin işlənməsindən - 2012-ci ildən əvvəl Azərbaycan üçün daha böyük həcmdə qaz almaq üçün bütün mümkün variantları gözdən keçirməyi Azərbaycan Dövlət Neft Şirkətinə təklif edib. Trend xəbər verir ki, bu barədə BP Azerbaijan şirkətinin prezidenti Devid Vudvord məlumat verib.
"Hələ şirkətin tədbirlər, imkanlar və əlavə qaz hasilatının həcmləri barədə konkret təklifləri yoxdur, lakin biz əlavə qaz almaq imkanını gözdən keçirmək, Azərbaycanın 2012-ci ilə qədər öz daxili tələbatlarını təmin edə bilməsi üçün birlikdə işləyirik", - deyə o qeyd edib.
Bir variant "Azəri" yatağından səmt qazıdır. Lakin unutmaq olmaz ki, şirkət onu geriyə - laya vurmaq niyyətindədir. Əgər bu həyata keçirilsə, o zaman hasilat azalacaq.
Digər variant müasir texnologiyalardan istifadə etməklə, Dövlət Neft Şirkətinin sərbəst şəkildə işlədiyi "Günəşli" yatağının dayazsulu hissəsində qaz quyularının qazıntısının başa çatdırılmasıdır. Bu, qaz hasilatını artırmağa imkan verəcək.
Daha bir variant "Azəri"-"Çıraq"-"Günəşli" yatağının daha dərin laylarındakı sərbəst qazdır. D.Vudvord qeyd edib ki, bu qazın bir hissəsinin hasilatını sürətləndirmək olar. Şirkət başçısı bildirib ki, BP bu qazın geniş miqyasda işlənməsini həyata keçirməyi hökümətə təklif edib. Lakin qazın bir hissəsi bir qədər əvvəl - 2008-2009-cu illərdə hasil oluna bilər.