Azərbaycan, Bakı /müx. Trend N. Kirtsxalia/ Azərbaycan benzininin Gürcüstana idxalı daxili bazarda neft məhsullarının qiymətinin qəfil artımının qarşısını alır. Belə bir fikrə Gürcüstanın idxalçılar, ixracatçılar, istehlakçılar və neft istehsalçıları ittifaqında gəlinib.
İttifaqdan qeyd ediblər ki, dünya bazarında neft qiymətlərinin artımı Gürcüstanda neft məhsulları qiymətlərinin yüksəlməsinə gətirib çıxarır. Respublikada benzin və dizel yanacağının qiymətləri orta hesabla təqribən 0,10 lari (1 ABŞ dolları 1,68 lariyə bərabərdir) artıb və artıq ilin maksimum göstəricisinə çatıb. Belə ki, indi "Super" markalı benzinin litri 1,7 lari, "Premium" - 1,6 lari, "euro regular" isə 1,45 - 1,50 lariyə satılır. Gürcü ekspertləri hesab edirlər ki, yaxın vaxtlarda qiymətlər daha 3-5 tetri arta bilər.
Bu fonda Gürcüstana idxal olunan Azərbaycan benzininin topdan satış qiyməti 1,38-1,40 lari təşkil edir. Nəticədə bu, Avropa ölkələri ilə müqayisədə Gürcüstan benzin qiymətlərindəki sabitliyi təmin edir. Ekspertlərin fikrincə, Azərbaycan benzininin idxalı Gürcüstanın benzin istehlakı bazarına müsbət təsir göstərir. Qeyd edək ki, Azərbaycandan hər 3-5 gündən bir Gürcüstana benzin idxal etmək mümkündür.
