Azərbaycan, Bakı / Trend / Azərbaycan Dövlət Neft Şirkətinin (ADNŞ) Marketinq və İqtisadi Əməliyyatlar İdarəsi Novorossiyskdən 1,2 mln. barrel Yurals markalı neftin yüklənməsinə dair tenderi qapalı elan edib. Bu barədə çərşənbə günü ADNŞ-dən məlumat veriblər.
Tenderin qalibi İsrailin "Oil Refineries LTD" şirkəti olub.
Neft iki partiya ilə yüklənəcək. Birinci partiya - 600 min barrel 18-20 iyunda, ikinci isə - 600 min barrel 29-30 iyunda yüklənəcək.
Yanvarda ADNŞ öz neftini Bakı - Novorossiysk kəməri ilə daşımayıb. Fevral, mart, aprel və may ayında ADNŞ-in Novorossiyskdən hər biri 450 min barrelə bərabər üç neft partiyası yüklənib.
ADNŞ tərəfindən bu kəmərlə neft nəqlinin dayandırılması bütün neftin elektrik stansiyaları üçün yanacağın əldə edilməsi məqsədilə neft emalı zavodlarına göndərilməsi ilə izah olunur. Bu il Azərbaycan Rusiyadan qazın idxalını dayandırıb. Bu qaz elektrik stansiyalarında elektrik enerjisinin istehsalı üçün istifadə olunurdu.
2007-ci ildə ADNŞ-in Novorossiyskdən neftini aşağıdakı şirkətlər alıb:
Glencore Energy UK Ltd - fevral (450 min barrel);
REOC Ltd - mart (450 min barrel);
Glencore Energy UK Ltd - aprel (450 min barrel);
Sunoil SA - may (450 min barrel);
Oil Refineries LTD - iyun (1,2 mln. barrel).
