Azərbaycan, Bakı/ Trend müxbir S.Əliyev/ 2007-ci ildə Azərbaycan öz qazının hasil olunması hesabına Rusiyadan idxal olunan bu yanacaq növünün yerini doldura biləcək. Bunu cümə axşamı Azərbaycan Dövlət Neft Şirkətinin geologiya, geofizika və hasilat üzrə vitse-prezidenti Xoşbəxt Yusifzadə bəyan edib.
"Qazprom" tərəfindən qiymətlər xeyli artırıldığından 2007-ci il yanvarın 1-dən Rusiyadan qazın idxalı dayandırılıb.
Yusifzadənin sözlərinə görə, 2007-ci ildə Azərbaycan üçün qazın ümumi balansı 10,9 mlrd. kubmetr təşkil edəcək. Bura daxil edilmiş qazın 2,7 mlrd. kubmetri "Şahdəniz" yatağından, 3,2 mlrd. kubmetri "Azəri-Çıraq-Günəşli" yatağından təmin olunacaq, 5 mlrd. kubmetr qazı isə Dövlət Neft Şirkəti öz yataqlarından hasil edəcək.
"2010-cu ildə Azərbaycanda 22 mlrd. kubmetrdən çox qaz hasil olunacaq. Amma buna baxmayaraq, ölkə yeni yataqların kəşf olunması üçün geoloji kəşfiyyat işlərini davam etdirəcək" - deyə Yusifzadə bildirib.
Onun sözlərinə görə, "Şahdəniz" yatağında qazılmış SDX-4 qiymətləndirmə quyusu 1,2 trln. kubmetr qaz ehtiyatının olmasını təsdiq etməyə imkan verir. "Amma ehtiyatların təsdiq olunması üçün daha bir quyu qazılacaq" - deyə o söyləyib.
2007-ci ildə "Şahdəniz" yatağından cəmisi 5,7 mlrd. təbii qaz hasil olunacaq.
"Şah dəniz" layihəsinin işlənilməsi barədə razılaşma 4 iyun 1996-cı ildə imzalanıb. Müqavilənin iştirakçıları aşağıdakılardır: "BP" (operator) -25,5 faiz, "Statoil" - 25,5 faiz, "NICO" - 10 faiz, "Total" - 10 faiz, "LukAgip" - 10 faiz, "TPAO" - 9 faiz və ARDNŞ - 10 faiz.
