Azərbaycan, Bakı, 21 fevral / Trend , müxbir S.Babayeva/ Azərbaycanın hər üç GSM - mobil rabitə operatoruna 3G - üçüncü nəsil rabitə xidmətlərinin göstərilməsi üçün tezliklər təklif edilib. Bu barədə cümə axşamı Azərbaycanın rabitə və informasiya texnologiyaları naziri Əli Abbasov məlumat verib.
"Biz onlara tezliklər təklif etmişik və onlar öz aralarında danışıqlar aparırlar", - nazir bildirib.
Abbasovun sözlərinə görə, operatorlar 2008-ci ilin birinci rübündə texniki məsələləri həll etdikdən sonra, idarə onların lisenziyasını nəzərdən keçirə bilər.
Azərbaycanda dörd mobil rabitə operatoru var. Onlardan üçü - Azercell Telecom, Bakcell və Azerfon - GSM, biri - Catel - CDMA üzrə fəaliyyət göstərir. Mobil rabitə operatorları abunəçilərinin ümumi sayı 4 mln.-u ötür.
3G standartı Beynəlxalq Elektrorabitə İttifaqı tərəfindən hazırlanıb və IMT-2000 (International Mobile Telecommunications 2000) adını daşıyır. 3G - "üçüncü nəsil" İnternet şəbəkəsi xidmətlərinə yüksəksürətli çıxışla məlumatların ötürülmə kanalını yaradan radiorabitə texnologiyasını birləşdirir. 3G- üçüncü nəslin şəbəkələri təqribən 2 QQç tezlikli diapazonda işləyir və 2 Mbit/s sürəti ilə məlumatları ötürə bilir. O, videotelefon rabitəsi təşkil etməyə, mobil telefonda film və teleproqramlara baxmağa və s. imkan verir.
Dünyada iki 3G standartı var: UMTS (və ya W-CDMA) və CDMA2000. UMTS ,əsasən, Avropada CDMA2000 - Asiya və ABŞ-da yayılıb. Wireless Intelligence-in məlumatına görə, 2006-cı il noyabrın sonuna dünyada 364 mln. 3G abunəçisi olub. Onlardan 93,5 mln. UMTS şəbəkələrinə, 271,1 mln. İsə, CDMA2000 şəbəkəsinə qoşulub.
