Azərbaycan, Bakı, 12 iyun / Trend , müxbir S.Babayeva /
Azərbaycanın rabitə və informasiya texnologiyaları naziri Əli Abbasov Nyu Yorka rəsmi səfərə yollanacaq. Bu barədə Rabitə Nazirliyindən bildirilib.
"İyunun 15-18-də baş tutacaq səfərin əsas məqsədi Avrasiya transmilli superinformasiya magistralının salınması üzrə layihənin həyata keçirilməsində BMT-dən dəstək almaqdır", -nazirlikdən bildirilib.
Layihənin məqsədi ucuz və keyfiyyətli internetə qoşulmaq, genişzolaqlı xidmətlərdən yaralanmaq, elektron informasiya şəbəkələrinin və elektron bazarının inkişafı üçün güclü informasiya infrastrukturunun yaradılmasıdır.
Səfər çərçivəsində BMT-nin qərargahında genişmiqyaslı təqdimatların və brifinqlərin, həmçinin BMT-nin üzv dövlətlərinin səfirləri ilə görüşlərin keçirilməsi planlaşdırılıb.
Azərbaycanın Rabitə Nazirliyi bu günlərdə ölkədə fəaliyyət göstərən 20 ölkənin səfirləri üçün nəzərdə tutulan layihənin geniş təqdimatını keçirib.
Rabitə Nazirliyindən bildiriblər ki, layihənin reallaşdırılması iştirakçı ölkələr üçün təkcə informasiya texnologiyalarının deyil, eyni zamanda sosial sektorun və iqtisadiyyatın digər istiqamətlərinin inkişafına imkan yaradacaq.
Ekspertlər hesab edir ki, layihənin həyata keçirilməsi üçün vahid idarəetmə strukturu yaradılmalıdır, maraqlanan ölkələrı tariflərin nizamlanması üçün şəbəkənin qurulması üzrə vahid strategiyanın yaradılmasında iştirak etməlidirlər.
Layihənin dəyəri hələ müəyyənləşdirilməyib. Layihənin təşəbbüskarları Azərbaycan Hökuməti və ABŞ-ın Ticarət və İnkişaf Departamentidir.
Məqalə müəllifi ilə əlaqə ünvanı: [email protected]
