Azərbaycan, Bakı, 12 avqust / Trend , müxbir Q.Vəliyev /
Sentyabrda internet xidmətləri üzrə tariflərin növbəti dəfə azaldılması gözlənilir. Bu barədə junalistlərə müsahibəsində Azərbaycanın rabitə və informasiya texnologiyaları naziri Əli Abbasov bildirib.
Nazirin sözlərinə görə, ilkin məlumatlara əsasən, əhaliyə göstərilən internet xidmətlərinin qiymətində30-50 faizlik azalma gözlənilir. Hazırda bir sıra provayderlə internet qiymətlərinin azalması üzrə müəyyən razılıqlar əldə olunub.
Hazırda respublikada genişzolaqlı internet xidmətlərinin qiyməti region üzrə orta hesab olunur, lakin yüksək işgüzar aktivliyi nəzərə alsaq qlobal şəbəkəyə giriş tarifləri gələcəkdə də vaxtaşırı azaldılmalıdır.
İlin əvvəlində qəbul olunmuş qərara müvafiq olaraq, 2 Mbit/s sürətli şəhərdaxili rəqəmsal kanalların (port) istifadəyə verilməsi tarifləri bəzi təşkilatlar (büdcə təşkilatları istisna olmaqla) üçün 1200 manatdan (təxminən 1500 dollar) 600 manata kimi (təxminən 750 dollar) endirilib. Bu kanallardan aylıq istifadə tarifləri isə 320 manatdan (təxminən 400 dollar) 300 manata kimi (təxminən 375 dollar) (6,3 faiz) endirilib.
Məqalə müəllifi ilə əlaqə ünvanı: [email protected]
