Azərbaycan, Bakı, 26 avqust / Trend , müxbir Q.Vəliyev /
Fizika İnstitutunun Hesablama Mərkəzinin mütəxəssisləri İsveçrədə yerləşən Avropa Nüvə Tədqiqatları Mərkəzindədirlər (CERN), bu barədə Trend -a Azərbaycan Milli Elmlər Akademiyasının Fizika İnstitutundan bildirilib.
Mənbənin məlumatına əsasən, nümayəndə heyətinin səfərində əsas məqsəd BAK-ın (Böyük adron kollayderi) işə salınması layihəsi çərçivəsində gələcək əməkdaşlığın nəzərdən keçirilməsidir. Hazırda Fizika İnstitutunun Hesablama Mərkəzinə CERN ilə opreativ informasiya mübadiləsi üçün istifadə ediləcək 34 Mbit/s buraxılış gücünə malik yüksək sürətli rabitə kanalının verilməsi nəzərdən keçirilir. Bu məqsədlə hazırda kollayder detektorlarından daxil olan məlumatın emalı üçün tətbiq ediləcək GRID paylanmış hesablama sistemlərinin işi nəzərdən keçirilir.
Hazırda Fizika İnstitutunun Hesablama Mərkəzində hesablama texnikasının və proqram təchizatının quraşdırılması üzrə işlər başa çatıb.
Məlumatların emalında dünyanın 33 ölkəsinin 140 institutunda quraşdırılan kompyuterlər iştirak edəcək. Bütün sistem bir güclü kompyuter kimi real vaxt rejimində işləyəcək. Bunun üçün artıq bütün dünya üzrə konkret məsələləri həll edəcək və nəticələri CERN-nin əsas mərkəzinə göndərəcək xüsusi hesablama mərkəzləri qurulub.
CERN-in məlumatlarına əsasən, BAK-ın təkrar işə salınması sentyabrda baş tutacaq. Fransa və İsveçrə sərhədində yerləşən 27 kilometrlik qurğu 2009-cu ilin oktyabr ayında tam gücü ilə işləməyə başlayacaq.
Məqalə müəllifi ilə əlaqə ünvanı: [email protected]
